Bashkia e Durrësit i është përgjigjur akuzave të Partisë Demokratike se ka shpërndarë brenda muajit mars-prill 40 milionë euro për familjet e prekura nga tërmeti i nëntorit 2019, në funksion të zgjedhjeve parlamentare të 25 prillit.
Sipas Bashkisë së Durrësit, shpërdarja e këtyre fondeve nuk ka të bëjë me zgjedhjet, por është në kuadër të procesit të rindërtimit që ka nisur në dhjetor 2019 dhe përfshin gjithashtu dhënien e bonusit të qerave.
Ditën e sotme, Kandidati i partisë Demokratike, në qarkun e Durrësit, Oerd Bylykbahi, doli në një deklaratë për mediat ku akuzoi qeverinë e drejtuar nga Edi Rama për shkelje të kodit elektoral.
Ai ka përmendur shifra të cilat janë dhënë nga bashkitë e qarqeve të prekura nga tërmeti, brenda periudhës Mars-Prill.
Sipas tij, gjatë asaj periudhe janë dhënë plot 40 milion euro për familjet e prekura nga tërmeti.
Në reagimin e Bashkisë Durrës thuhet se është shpërndarë granti i rikonstruksionit për familjet e prekura nga tërmeti, në muajt mars dhe prill.
“Bashkia e Durrësit kërkon të sqarojë opinionin publik se procesi i shpërndarjes së grantit për rikonstruksion ka nisur që në fillim të vitit 2020 dhe është kryer sipas të gjitha procedurave të përcaktuara me VKM si dhe të miratuara në këshillin bashkiak me transparencë të plotë, pasi këto vendime janë të publikuara të gjitha në faqen zyrtare të bashkisë, ndërkohë që procesi vijon edhe këtë vit. Dhënia e këtij granti familjeve të Durrësit që do të rregullojnë shtëpitë e tyre është një nga etapat e procesit të rindërtimit i cili përfshin edhe dhënien e bonusit të qerave, rindërtimin e pallateve dhe banesave individuale, rikonstruksionin e ambienteve të përbashkëta të pallateve, rindërtimin e shkollave e kopshteve, riforcimin për pallatet me shkallë dëmi DS4”, thuhet në reagim.
Bashkia e Durrësit shprehet se në vitin 2020 kanë përfituar 10697 familje grantin e rikonstruksionit dhe në gjysmën e parë të vitit 2021 kanë përfituar 4294 familje.
