Sekretari i Përgjithshëm i PD, Gazment Bardhi, ka renditur faktet, që sipas tij, tregojnë blerjen e votave në zgjedhjet e 25 prillit nga ministrja Belinda Balluku, e cila kandidonte si pjesë e listës së kandidatëve të PS-së në Qarkun e Tiranës.
Bardhi shkruan se Balluku është për burg, ndërsa shton se ajo mund të mashtrojë për 1 ditë, por nuk e mashtron dot SPAK, që ka në dorë provat e blerjes së votave përmes legalizimeve.
“Një drejtësi pa ndikim nga qeveria duhet ta çojë Belinda Ballukun pas hekurave të burgut”, shkruan Bardhi.
Duke renditur faktet, Sekretari i Përgjithshëm i PD shprehet se shtabi elektoral i Belinda Ballukut, me në krye drejtuesen e shtabit, filan fistekja (e di Marinela) mbledhin të dhënat e banorëve të zonës elektorale të Belinda Balkukut për të kryer legaliizimin para zgjedhjeve. Sipas tij, ky është përdorim i burimeve shtetërore për qëllime partiale dhe elektorale dhe ndëshkohet nga ligji.
“Zyrat e Kadastrës janë vënë në dispozicion të shtabit elektoral të Belinda Ballukut për të bërë legalizime në masë deri të premten para zgjedhjeve.
Belinda Balluku nuk u shërben qytetarëve, por blen vota me legalizimet në kundërshtim me ligjin. Në 24 prill grupi i krijuar për legalizimet në Kombinat u shpërbë pa patur më interes për gjoja shërbimin ndaj qytetarëve.
Ky i Belinda Ballukut është një krim elektoral, që ka deformuar vullnetin e qytetarëve. Votat e blera edhe me mënyra të tjera, nuk do ta shpëtojnë Belinda Balkukun nga drejtësia!”, thekson Bardhi.
