Pano Soko, numri 1 listës së “Nisma Thurrje” në Tiranë ka reaguar pas qartësimit të rezultatit të zgjedhjeve të 25 Prillit. Edhe pse Pano apo kandidatët e tjerë të “Nismës” nuk arritën të merrnin mandat në këto zgjedhjeve, duket se projekti i tyre do të vijojë.
Soko shprehet se zgjedhjet lokale janë në horizontin e afërt dhe “ne do të përgatisim gjithë aksionin, me qëllim daljen me një ofertë dhe ekipe serioze për bashkitë dhe këshillat bashkiakë”.
Në një reagim në FB, ai shprehet:
“Dy fjalë të sinqerta. E para. Faleminderit për votën tuaj! Edhe pse jashtë parlamentit, e ndjej përgjegjësinë e të përfaqësuarit të mijëra shqiptarëve që më rëndon shumë. Shpresoj ta meritoj! E dyta, ecim përpara! Zgjedhjet lokale janë në horizontin e afërt dhe ne do të përgatisim gjithë aksionin, me qëllim daljen me një ofertë dhe ekipe serioze për bashkitë dhe këshillat bashkiakë. Si zakonisht do të vijmë me format ndryshe nga ç’vijnë të tjerët. Me gjuhë të thjeshtë, interesantë, por padiskutim seriozë në propozimet tona. Synimi është i qartë. Të ribindim ata që na votuan dhe të përpiqemi të sjellim dhe ata që s’na votuan këtë radhë. Respekt dhe mirënjohje për të gjithë ju! Shihemi..”
