Ndërkohë që në Tiranë, anëtarë të Kryesisë dhe Kvshillit Kombëtar të PD kanë kërkuar marrjen e përgjegjësive dhe largimin e Lulzim Bashës si kryetar i PD, në mbështetje të tij, krahas deputetëve të sapozgjedhur dhe drejtuesve të qarqeve, janë rreshtuar edhe disa Kryetarë të degëve të kësaj partie.
Kvshtu pas degës së PD në Sarandë, kanë reaguar pro Bashës edhe drejtuesit e degëve të Shkodrës, Kukësit dhe Fushë-Krujës.
Në tre reagime të ndryshme të degëve në fjalë, vihet re mbështetja e tyre për kreun aktual të PD-së, duke theksuar se ata dëshirojnë që të vazhdojnë përpara me Bashën.
Kreu i PD-së në kukës, Arif Rexhmati thekson se votat e vjedhura e shantazhet janë realitet politik i Edi Ramës dhe nuk janë kryer nga lider demokrat, andaj të gjithë duhet të bashkohen rreth Bashës.
Edhe kryetari i PD-së së Shkodrës, Xhevdet Amuli shprehet se Partia Demokratike duhet të vazhdojë përpara nën drejtimin e Lulzim Bashës.
“Por Shkodra, si cdo herë tjetër, qëndroi burrneshë dhe doli faqebardhe. Numri i lartë i votave të pavlefshme si në qarkun tonë ashtu edhe në të gjithë Shqipërinë tregon që mashtrimi elektoral ka vazhduar nga ana e PS dhe aleatëve të saj në krim, deri ne tavolinat e numërimit, ku numëruesit e tyre janë parë me zë dhe figurë duke plotësuar në shkelje flagrante të ligjit fletët e votimit. Ecim përpara me Lulzim Bashën”, shkruan Amuli.
Ndërsa, kreu i PD-së në Fushë-Krujë, Agron Loka, deklaron se demokratët e Bashkuar rreth zotit Basha do ta arrijnë fitoren që meritojnë.
“Të nderuar qytetar të Fushë-Krujës, Niklës, Bubqit dhe gjithë Bashkisë Krujë, më lejoni t’iu shpreh falenderimet më të përzemërta dhe më të sinqerta për të gjithë ju që me fisnikërinë dhe besnikërinë tuaj edhe pse nën presjonin e terrorin e pushtetit të korruptuar dhe po ashtu të krimit të organizuar, na mbështetët dhe besuat në ndryshimin e madh.
Me përultësi dhe mirënjohje pa fund për të gjithë ju mbështetës, ne nuk dorëzohemi, por përkundrazi të gjithë të bashkuar me kryetarin Lulzim Basha, asgjë nuk do të ndalë që Shqipëria të fitojë”, shprehet Loka.
