Kryeministri Edi Rama u shpreh mbrëmjen e sotme në “Opinion” se edhe raporti paraprak i OSBE/ODIHR vlerëson procesin zgjedhor.
Rama u pyet lidhur me Ornaldo Rakipin, djalin e ish-deputetit Aqif Rakipi, i cili arriti të thyejë herësin dhe të nxjerrë jashtë loje edhe Ervin Bushatin, kreun e degës së PS në Tiranë.
“Edhe në Francë edhe në SHBA ndodh që njerëzit e panjohur të jenë në Parlamentin francez apo Kongresin e SHBA. Ky djali vjen nga komuniteti çam. Mos u çudisni fare vota është përfaqësim. Kuksianët, tropojanët, dibranët votojnë për kandidatë që vijnë nga këto zona. Në Paskuqan kishim një vajzë që ishte nga komuniteti kuksian, i cili ka marrë shumë vota”, tha Rama.
Kryeministri u përball me denoncimin e një qytetari që pohonte se i kishin afruar para për votat, ndërsa Rama tha se nuk vinte aspak në dyshim këto denoncime.
“Ka shumë denoncime të cilat duhet të hetohen nga Prokuroria dhe SPAK, le të përballen me drejtësinë, të shkojnë në burg”, tha Rama.
