Kur janë numëruar 181 nga 411 qendra votimi në Shkodër, kandidati i PD-së Bardh Spahia rezulton më i votuar në të gjithë Qarkun.
Spahia numëron deri më tani 3 711 vota, i ndjekur nga Benet Beci më 3 701 vota.
Në vendin e tretë renditet Lodovik Hasani me 3 451 vota, një personazh mjaft popullor në zonën e Pukës dhe jo vetëm.
Tom Doshi i PSD renditet i katërti me 3 045 vota.
Në Shkodër, PD ka marrë 5 mandate, PS-3, PSD-2 dhe LSI-1.
Në këtë qark, nga 4 më të votuarit, mandati është i sigurt për Becin e PS që renditet i treti në listën e PS. Po ashtu dhe për Doshin, i pari në listën e PSD, nëse ky i fundit nuk do të dorëheqej nga mandati i deputetit.
Dy më të votuarit në listat e PD, ndërkohë, renditen në vendet 6 e 7 dhe e vetmja mënyrë për të hyrë në Kuvend është thyerja e herësit. Secilit i duhet të marrë më shumë se 9 441 vota, mision që duket i vështirë. Në këtë mënyrë, dy më të votuarit nga PD në Shkodër, rrezikojnë të mbesin jashtë parlamentit të ri.
