VIDEO/ Ngjarja e shëmtuar në Laç, Partizani dënon dhunën: FSHF e Policia të marrin masa!

Partizani ka reaguar për tensionin e krijuar në ndeshjen e sotme me Laçin në transfertë. Trajneri i portierëve, Ilir Bozhiqi, u godit me një send në kokë, ndërkohë që në tribunë nuk menduan as ofendimet.

Trajneri Daja refuzoi të flasë pas ndeshjes për atë që ndodhi, ndërkohë që tani klubi kryeqytetas ka dalë me një qëndrim dhe dënon presionin dhe dhunën verbale të ushtruar, si dhe u kërkohet falje tifozëve të tre që janë detyruar të dëgjojnë ofendime nga më të ndryshmet.

Reagimi i Partizanit:

“Të gjithë mezi po presim rikthimin e tifozëve në stadium por JO KËSHTU! Partizani gjithmonë ka kërkuar të luajë brenda respektit të rregullave të mikpritjes dhe ndershmërisë sportive dhe gjithçka t’ia lërë fushës së blertë.

Sot nuk ka patur as rregull as fair-play dhe mbi të gjitha as qytetari. Jashtë çdo etike skuadra dhe stafi ynë është fyer për gjatë gjithë ndeshjes me një fjalor të turpshëm dhe të papranueshëm nga tifozët në tribunë.

Megjithëse thjesht pjesëmarrës dhe jo faktorë, në këtë moment ndjejmë përgjegjësinë të kërkojmë ndjesë ndaj të gjitha nënave e motrave, fëmijëve e të rriturve që kanë dëgjuar nëpërmjet ekranit sharjet e panumërta dhe mungesën e theksuar të etikës.

Në të njëjtën kohë përgëzojmë skuadrën dhe stafin që pavarësisht dhunës verbale konstante, tregoi karakter dhe arriti të menaxhonte një ndeshje futbolli në kushte ekstreme. Gjithashtu dënojmë në mënyrë absolute dhunën fizike në tribunë dhe fushë e sidomos atë që u pa në TV, goditjen me shishe në kokë në drejtim të trajnerit të portierëve tonë Ilir Bozhiqi nga tifozët.

Distancohemi dhe dënojmë këto incidente që po prishin dhe mbase edhe po cenojnë garën e fortë dhe të bukur që futbolli në vend po ofron këtë vit me shpresën se episode të tilla mos tolerohen e mos përsëriten më.

Për këtë arsye i bëjmë thirrje si Federatës Shqiptare të Futbollit ashtu dhe Policisë së Shtetit të investigojnë dhe vënë para përgjegjësisë shkaktarët e këtyre akteve, si dhe të marrin të gjitha masat e nevojshme organizative për mbarëvajtjen e aktiviteteve sportive dhe shmangien e rasteve të tilla”.