Kreu demokrat Lulzim Basha ka reaguar sot nga selia e PD-së lidhur me zgjedhjet e 25 prillit. Në prani të disa dhjetra mbështetësve të PD, Basha tha se prej muajsh bëri betejën për demokracinë.
“Besova se mund të fitonim betejën për të rikthyer demokracinë në Shqipëri, por përballë kishim një regjim. Miliona euro të hedhura për të blerë votën, përdorën milionat e koncensioneve, përdorën kriminelët dhe bandat, kërcënuan votuesit, gazetarët, median. Votat e pavlefshme janë dyfishi i diferencës mes nesh dhe atyre.
Edi Rama kandidoi përfaqësuesit e krimit, bashkëpunoi me Tom Doshin, i cili ka Botën demokratike kundër. Ne jemi më të vendosur se kurrë, kushdo që mendon se do të dorëzohemi nuk na njeh mirë. Ne do e vazhdojmë betejën me gjithë fuqinë tonë, ne do të vazhdojmë deri në fitore”, tha Basha.
Ai u shpreh se nëse ne dorëzohemi, Shqipëria nuk ka asnjë mundësi, dhe kjo s´do të ndodhë kurrë.
Basha shprehu falenderime për shqiptarët që votuan koalicionin PD-AN, ndërsa u shpreh se mbi 600 mijë shqiptarë i besuan alternativës sonë.
“Ne do të luftojmë për ju, do të luftojmë për qindra e mijëra shqiptarë që votuan për ne, zëri juaj do të dëgjohet fort”, tha Basha.
Nën thirrjet liri-demokraci dhe poshtë komunizmi, Basha tha se fryma e ndryshimit është më e fortë se kurrë, ne jemi më të fortë se kurrë për të mbrojtur demokracinë.
“Beteja vetëm ka filluar dhe ne do e çojmë atë deri në fund, demokracia do të fitojë dhe Shqipëria do të fitojë”, tha Basha.
Fjala e Lulzim Bashës
Të dashur shqiptare dhe shqiptarë, vëllezër dhe motra, zonja dhe zotërinj,
Teksa muzgu i kësaj mbrëmje po bie mbi qytetet dhe fshatrat tona, mbi malet dhe luginat e Shqipërisë, një tjetër hije po avitet në zemrat dhe mendjet e shqiptarëve anembanë këtij vendi dhe kudo ku ndodhen.
A është ky muzgu i shpresës dhe ëndrrës për ndryshim, për Shqipërinë demokratike normale dhe të zhilluar, për Shqipërinë Europiane.
Kemi shumë vite që luftojmë për demokracinë
U deshën shumë vite që të rrëzonim regjimin komunist, por ne ja dolëm. Ia dolëm sepse jemi njerëz të fortë, jemi një popull që beson tek demokracia.
Beteja jonë për demokraci ka vijuar pandërpreë çdo cast, çdo ditë, anembanë Shqipërisë.
Edhe këto muaj, ne luftuam për demokracinë.
Unë besova se falë fuqisë së mrekullueshme të popullit tonë ne do fitonim dhe do ti kthenim Shqipërisë demokracinë.
Por këtë herë kjo nuk mjaftoi.
Nuk mjaftoi sepse këto zgjedhje nuk kishin të bënin me demokracinë.
Ne hymë në këtë betejë jo me një kundërshtar politik, por me një regjim që bëri gjithçka për ta shkatërruar garën e ndershme elektorale.
Ata ndryshuan kushtetutën dhe kodin zgjdhor duke thyer të gjithë rregullat. Dhjetëra mijëra vota të pavlefshme, numri më i madh ndonjëherë dhe dy herë më shumë sesa diferenca mes dy palëve.
Miliona euro të hedhura për të realizuar blerjen më të madhe industriale të votës duke shkaktuar deformimin më të madh të vullnetit të zgjedhësve.
Ata përdorën milionat e koncesioneve të korruptuara,
vodhën të dhënat personale të qytetarëve shqiptarë,
përdorën kriminelët dhe bandat,
kërcënuan dhe shantazhuan votuesit, administratën, gazetarët dhe median
duke e bërë edhe më të madhe masakrën elektorale.
Edi Rama ka bashkëpunuar dhe vazhdon të bashkëpunojë hapur me përfaqësues të krimit si Tom Doshi që kanë gjithë botën demokratike kundër. Ai kandidoi përsëri përfaqësuesit e krimit në listat e tij.
Dhe pavarësisht gjithë kësaj – ne sollëm një arritje të madhe për demokracinë në Shqipëri.
Ne u bëmë më të fortë.
Ne jemi më të vendosur se kurrë.
Kushdo që mendon se ne do të dorëzohemi – nuk na njeh mirë!
Ne do të vazhdojmë betejën me gjithë fuqinë tonë.
Ne do vazhdojmë të luftojmë me gjithçka kemi për demokracinë.
Do vazhdojmë të luftojmë deri në fitore, sepse misioni ynë është më i madh se të gjithë ne.
Po u dorëzuam ne, Shqipëria ska më asnjë mundësi.
Dhe kjo nuk do të ndodhë kurrë.
Dua tju falenderoj të gjithë ju, vëllezër dhe motra, shqiptare dhe shqiptarë kudo ku jeni,
Dua të falenderoj anëtarët dhe mbështetësit tanë, ekipin tonë të mrekullueshëm dhe aleatët tanë të koalicionit, komisionerët, numëruesit, vëzhguesit dhe vullnetarët e panumërt për angazhimin e tyre të pashembullt.
Mbi 600,000 shqiptarë votuan për ne, dhe sollën shpresë për Shqipërinë.
Të rinj dhe të reja, të moshuar, gra dhe burra, nga i gjithë vendi.
Ju falenderoj nga thellësia e zemrës për mbështetjen tuaj të mrekullueshme.
Faleminderit për besimin tuaj
Dhe ju premtoj sot: nuk do t’u zhgënjejmë kurrë
Ne do luftojmë për ju!
Do luftojmë për qindra mijëra qytetarë që votuan për ne dhe për ata të cilëve nuk ju numërua vota.
Zëri juaj do të dëgjohet qartë dhe fort.
Kjo është përgjegjësia ime, është detyrimi që kam para jush dhe para Shqipërisë.
Nata që ka rënë sonte do të largohet dhe dielli do të ngrihet përsëri nesër mbi horizont. Dielli i shpresës për Shqipërinë.
Fryma e ndryshimit është më e fortë se kurrë.
Ne jemi më të fortë dhe më të vendosur se kurrë.
Dhe të fortë, ne do luftojmë çdo ditë,
Ne do të luftojmë çdo orë,
Për të mbrojtur demokracinë dhe për të sjellë të gjithë bashkë një të ardhme më të mirë për vendin tone, për familjet tona për fëmijët tanë.
Beteja sapo ka filluar dhe ne do ta cojme atë deri në fund, deri në fitore!
Demokracia do të fitojë dhe Shqipëria do të fitojë.
Falemnderit!
Zoti e bekoftë Shqipërinë!
