Në Shqipëri nuk është parë asnjëherë një luftë kaq e ashpër për titullin kampion, sa kjo e këtij sezoni, ku katër skuadrat luftojnë për vendin e parë, ndërsa së fundmi është futur në këtë valle edhe Tirana.
Një kampionat me të vërtetë spektakolar ky i këtij sezoni, ku ende nuk dihen skuadra kampione, apo ato që shkojnë në Europë. E njëjta situatë është edhe në një kampionat elitar, siç është La Liga spanjolle. E njëjta situatë është edhe aty, ku Atletiko kryeson, e ndjekur nga Reali, Sevija dhe Barça, madje këta të fundit kanë mundësinë të marrin kryesimin, pasi ka një ndeshje më pak.
Prestigjiozja spanjolle “El Mundo”, i ka kushtuar një artikull luftës për titullin në Spanjë, teksa kanë kërkuar gjatë për të gjetur një situatë të njëjtë në një kampionat tjetër. “Duhet të gërmojmë thellë në futbollin europian për të gjetur një situatë si kjo në Spanjë. Shqipëria dhe Bosnjë Hercegovina kanë katër ekipe, të ndara me një diferencë prej 4 pikësh. Në pesë ligat kryesore, e vetmja në një situatë disi të ngjashme është ajo në Francë”, shkruan media prestigjioze.
