Dinamo po bëhet gati për Kategorinë Superiore. Kur kanë shtruar rrugën për ngjitjen me rezultatet e marra pak javë para mbylljes së krejt garës, tashmë në klub po mendojnë edhe për financat. Për t’u rikthyer më të fortë se kurrë në mesin e më të mirëve, duhet edhe një buxhet më i shëndetshëm.
Dhe për këtë, pritet që të afrohen donatorë të rinj. Dhe nuk bëhet fjalë për emra të panjohur, pasi vijnë nga… elita. Italianët duket se nuk do të jenë më të vetëm te kryeqytetasit, pasi prej ditësh po negociojnë me Ardian Bardhin.
Një nga presidentët e Teutës mund të financojë te blutë dhe duket se nuk është thjesht një dëshirë apo ide, por shumë më shumë se kaq. Prej ditësh ambienti po “zien” dhe çështje ditësh do të ketë diçka konkrete.
Panoramasport duke arritur te Ardian Bardhi, drejtuesi i lartë i durrsakëve nuk e konfirmoi, por as e mohoi një gjë të tillë. Ai deklaroi:
“Do t’ju japim një përgjigje së shpejti”. Kjo lë gjithçka të hapur dhe në vazhdim mund të mësojmë më shumë. Të njëjtën gjë bëmë edhe me administratorin Ermal Barushi, megjithatë ai nuk preferoi që të reagonte.
U bënë 9 vite që “nëndetësja” i mungon elitës së futbollit shqiptar. Që prej 2012-ës kur ranë, kurrë nuk kanë qenë kaq pranë rikthimit. Për të përmbyllur me sukses misionin, duhet të kalojnë me sukses edhe 3 finale./ Panoramasport
