Nga Boldnews.al
Shqiptarët më 25 prill kanë të drejtën e tyre legjitime për të zgjedhur qeverinë e re, duke përcaktuar të ardhmen e tyre.
Ndoshta ky është momenti që gjithkush duhet të ushtrojë të drejtën e vetme që i ka mbetur në një vend ku vendimmarrja pas votimit përcaktohet nga një grusht personash, qofshin në Qeveri apo Bashki.
Qytetarët janë të përjashtuar nga çdo proces vendimmarrës, që do të thotë një herë në 4 vite ato kanë të vetmen mundësi për të shprehur me votën e tyre qëndrimin pro ose kundër, të hakmerren ose të mbështesin ato që i qeverisin.
Dhe nëse nuk e ushtrojnë këtë të drejtë, vështirë se pas 25 prillit, zëri i tyre mund të dëgjohet deri në zgjedhjet e ardhshme. Ato do i ngjajnë atyre veglave muzikore pa zë, që sado të jenë në duar profesionistësh nuk lëshojnë tinguj. Njësoj do të jetë edhe nëse ju nuk do të votoni, zëri juaj do të jetë ose i mekur, ose do të jetë i mbytur nga ai i propogandës.
Ndaj dhe vota më 25 prill ka peshë, ose më saktë duhet të marrë vlerën që i takon, jo monetare, as të konvertuar me një pako ushqimesh, por atë rëndësinë që mund të shkundë themelet e një politike.
Nuk ka rëndësi për kë do votoni, thjesht shkoni dhe përmbushni jo thjesht një të drejtë Kushtetuese, por përcaktoni të paktën vetë se si doni të jetoni në vitet në vazhdim.
Nëse ndjeheni mirë me Qeverinë, nëse mendoni se në këto 8 vjet keni jetuar mirë, nëse mendoni se premtimet që ju janë dhënë janë mbajtur, nëse në xhepat tuaj ka më shumë para, nëse ekonomia familjare është më e mirë, atëherë keni shansin ta shprehni me votë mbështetjen tuaj. Me një votë jo detyruese, jo të imponuar nga frika, nga pakoja me ndihma, nga presioni apo intimidimi.
Nëse mendoni se kjo qeveri ju ka nëpërkëmbur, ju ka gënjyer, ju ka dhunuar, ju ka shembur banesa apo ju ka helmuar me gaz, atëherë ky është momenti që vota juaj jo e ndëshkon, por e përvëlon, shumë më shumë se çdo miting apo protestë revolte, që mund të thirret dhe organizohet.
Vota e 25 prillit duhet të jetë “plumb”, duhet të hidhet në kuti jo si një votë partiake, por bazuar në atë që gjithsecili nga votuesit ndjen, duke analizuar gjithçka që ndikon në jetën e tij.
Në dhomën e fshehtë të votimit nuk ju sheh njeri, jeni ju me një stilolaps në dorë, dhe Zoti lart. Askush nuk e di se për kë do të votoni, askush nuk e di nëse ju do t´i bëni ose jo qejfin atyre që ju paracaktojnë si votues të njërës apo tjetrës palë.
Kjo është mundësia që keni për të treguar se askush nuk mund t´ju shohë si mbështetës apo kundërshtarë, t´ju verë një çmim apo t´ju barazojë me një pako ushqimesh, apo të ndjeheni nën presionin e një vendi pune apo diçkaje tjetër.
Votoni si qytetarë të lirë, si qytetarë që askush nuk mund t´ju përdorë dhe më pas t´ju trajtojnë si dele. Kjo është mundësia që gjithsecili me peshën e tij të votës mund t´I kallë tmerrin çdo klase politike, çdo mazhorance, çdo qeverie dhe çdo hallke administrate që në fund të fundit paguhet nga taksat tuaja.
Më 25 prill do i keni në dorë të gjithë, edhe ata që ju premtojnë, edhe ata që nuk mbajnë premtime, edhe ata që ju kanë nëpërkëmbur edhe ata që ju mbyllin dyert, edhe ata që kujtohen 1 herë në 4 vjet edhe ata që ju nxjerrin gjuhën, edhe ata që ua vështirësojnë çdo ditë jetën, edhe ata që ju bëjnë të shihni ëndrra me projekte 3 apo 4D.
Gjithçka që keni shfrytëzojeni, shprehni revoltën ose mbështetjen, shprehni pakënaqësitë apo lumturinë, por bëjeni, që të nesërmen e 25 prillit, mos ndjeheni të anashkaluar, të shkelur me këmbë apo të pranoni zgjedhjen që bëjnë ata të cilët do të shkojnë symbyllurazi te kutitë.
Keni shansin për të treguar se jeni një shumicë e heshtur, shumë më e fortë se çdo organizatë apo strukturë partiake, shumë më e fortë se çdo strukturë legale ose jo, që kërkon t´ju trembë, t´ju mbajë larg, t´ju kërcënojë apo intimidojë. Ata kanë frikë nga ju, nëse më 25 prill do të shfaqeni me shumicë në qendrat e votimit, jo me urdhër, por me bindjen tuaj. Të paktën më 26 apo 27 prill nuk do të ndjeheni keq, se dikush tjetër vendosi për të ardhmen e fëmijëve tuaj, për familjen apo qoftë edhe për Ju.
