Nga BoldNews.al
Kryeinspektori i Policisë Bashkiake të Kavajës, Markel Shtylla dhe vartësi i tij, Dorian Troplini, e kanë dhunuar fizikisht sekretarin e Partisë Demokratike në qytet, Bledar Okshtuni, menjëherë pasi miku i tyre, Ndriçim Tahiri e plagosi me armë zjarri.
Ky detaj skandaloz është munduar të shmanget nga Policia e Shtetit, e cila njoftoi se ka arrestuar Shtyllën dhe Troplinin vetëm për “moskallëzim krimi”.
I plagosuri Okshtuni dhe dëshmitarë të tjerë në vend-ngjarje kanë deklaruar për grupin hetimor se zyrtarët bashkiakë detaje nga përplasja, e cila përfundoi me përdorimin e armës nga Ndriçim Tahiri (Jonuzi).
Sipas të dhënave të siguruara nga “Boldnews.al”, rezulton se agresori dhe dy shoqëruesit e tij kanë hyrë me dhunë në zyrën elektorale të Partisë Demokratike në Kavajë, pas një debati të ndodhur pak më herët.
Sapo ka hyrë në zyrën elektorale, Tahiri ka qëlluar menjëherë me tre plumba Okshtunin dhe është larguar.
Por, nuk ka përfunduar këtu. Dy zyrtarët e lartë bashkiakë i janë afruar të plagosurit, duke e goditur dhunshëm me grushta dhe shkelma, ndërkohë që Okshtuni ishte i shtrirë për shkak të dëmtimeve nga predhat e pistoletës.
Pasi e kanë dhunuar, kryeinspektori i Policisë Bashkiake, Markel Shtylla dhe polici bashkiak, Dorian Troplini, janë larguar së bashku me Ndriçim Tahirin në bordin e një mjeti.
Policia e Shtetit ka mbërritur me vonesë në vendin e ngjarjes. Kjo dallohet qartë edhe në pamjet filmike, në të cilat tregohej momenti kur i plagosur Okshtuni po shoqërohej nga bashkëpunëtorët e tij drejt spitalit për ndihmë mjekësore.
Tre agresorët qëndruan në arrati për shumë orë, ndërkohë që Policia njoftoi mëngjesin e së Mërkurës se i kishte arrestuar, pa dhënë detaje mbi operacionin e zhvilluar.
Të dhënat e siguruara nga redaksia flasin se tre personat janë dorëzuar vetë në Policinë e Kavajës, ndërkohë që nuk dihet se ku kanë qëndruar dhe nëse kanë qenë të tre bashkë, apo të veçuar gjatë orëve të arratisë.
Tashmë, Ndriçim Tahiri (Jonuzi) është i arrestuar për veprat penale të “plagosjes së rëndë me dashje” dhe “armëmbajtje pa leje”.
Ndërsa, sipas Policisë, Markel Shtylla dhe Dorian Troplini, dyshohen për “moskallëzim krimi”.
Por, gjithësesi, rasti është në duart e prokurorit të çështjes, Durim Bedini, i cili pritet t’i drejtohet gjykatës për caktimin e masave të sigurimit ndaj tre agresorëve.
