Një 37-vjeçar është arrestuar nga policia e Durrësit pasi akuzohet se ka qëlluar me armë mbrëmjen e djeshme.
Specialistët për Hetimin e Krimeve në Stacionin e Policisë Manzë arrestuan në flagrancë shtetasin M.B., 37 vjeç, banues në Ishëm, Durrës, i dënuar më parë për veprën penale “Shkatërrim prone”, njoftuan këtë të Premte burime zyrtare nga policia.
Të njëjtat burime sqaruan se arrestimi i tij u bë pasi më datë 22.04.2021 (Të Enjten), rreth orës 21:30, në Hamallë, pas një konflikti për motive të dobëta me shtetasin S.C. (T)., 24 vjeç, ka qëlluar në ajër me armë zjarri duke prishur rendin dhe qetësinë publike.
Gjatë kontrollit në banesën e shtetasit M.B., shërbimet e Policisë gjetën dhe sekuestruan në cilësinë e provës materiale 2 armë gjahu në pronësi të shtetasit N.B. (babai i të arrestuarit) dhe mjetin me të cilin është larguar autori.
Në vijim të veprimeve u bë shpallja në kërkim policor, për veprën penale “Moskallëzim i krimit”, e shtetasit B.M., 28 vjeç, banues në Hamallë, Sukth, Durrës, thuhet më tej në njoftimin e policisë.
