Ish-kryeministri Sali Berisha denoncon se Suel Çela dhe Kelmend Xhaferi kanë mbetur të plagosur në ngjarjen e ndodhur në Elbasan të Mërkurën dhe po mjekohen në një spital në Tiranë, nën kujdesin e autoriteteve.
Në një postim në FB, Berisha publikon një mesazh për të cilin zbulon se ka ardhur në adresë të tij. Duke iu referuar mesazhit, Berisha shton se Rama ka urdhëruar sjelljen e tyre nga Labinoti për mjekim në Tiranë.
Në mesazh, shkruhet:
“Kam info që Suel Çela dhe Kel Cami kane mbetur të plagosur në shkëmbimin e zjarrit në Elbasan. Ata nga vendi iu ngjarjes policia jo në spital si të plagosurit e tjerë, sepse janë në kërkim, por i ka transportuar në Labinot te ndërmarrja e Gjergji Lucës. Duket se gjendja e tyre është përkeqësuar dhe po atë pasdite me urdhër direkt të Ramës dhe nën kujdesin e Taulant Bego Yaris ata janë transportuar të shoqëruar edhe nga Policia për mjekim në një spital privat në Tiranë”.
Ndërkohë, në njoftimin zyrtar të policisë për ngjarjen e Elbasanit, nuk përmenden emrat e Suel Çelës dhe Kelmend Xhaferit. Ky i fundit, sipas raportimeve mediatike, është shpallur në kërkim policor, por ky informacion nuk u konfirmua në konferencën e mbajtur nga kreu i Policisë së Shtetit, Ardi Veliu një ditë më parë. Si Xhaferi dhe Çela janë emra të njohur në raportimet e kronikës së zezë. Ata janë akuzuar për atentatin ndaj policëve në tregun agro-ushqimor në 18 shtator të 2017 në Elbasan, ku u përplas nga një “Audi” makina e policisë lokale.
Lidhur me rastin, Çela u shpall i pafajshëm, ndërsa gjykata e Krimeve të Rënda dënoi 5 vite burg Klemend Xhaferrin.
