Gazeta zvicerane “Neue Zürcher Zeitung” ka botuar një artikull lidhur me situatën politike aktuale në vendin tonë duke u ndalur më së shumti në zgjedhjet që do të mbahen në datë 25 Prill.
Në shkrimin e titulluar “Shpresa për reforma është zhdukur në Shqipëri. Kryeministri Edi Rama po synon për një mandat të tretë”, gazeta zvicerane thekson se gjatë 8 viteve të qeverisjes së Partisë Socialiste shumë aspekte kanë ardhur duke u përkeqësuar.
“Shpresa e një frymëmarrje të freskët, e cila solli Ramën në qeveri në 2013, ka kohë që është zhdukur. Vështirë se diçka është përmirësuar në tetë vjet dhe mjaft prej tyre edhe janë përkeqësuar. Në zgjedhjet e së Dielës, Rama dëshiron të bëhet kryeministër për herë të tretë. Kjo do të ishte hera e parë që do të ndodhte në Shqipërinë post-komuniste, që një qeveri të qëndrojë në pushtet për tre mandate rresht”, shkruhet ndër të tjera në artikullin e gazetës zvicerane.
Në artikull flitet edhe për tendencat autoritare. Gazeta zvicerane “Neue Zürcher Zeitung” shkruan se Edi Rama, nga ish-bartës i shpresës, është kthyer në një lider autokrat.
“Një shembull i tendencave gjithnjë e më autoritare të ish-bartësit të shpresës është trajtimi kontradiktor i lirisë së shtypit. Si anëtar i opozitës, ai kritikoi ashpër përpjekjen e qeverisë për të kufizuar lirinë e shtypit. Në një ligj për media të hartuar në 2019, ai synoi pikërisht këtë: dënimet e larta që kërcënuan për ‘raportimin e njëanshëm’ kishin për qëllim presionin ndaj mediave që ishin kritike ndaj qeverisë. Projekti u anulua pas protestave”, shkruhet në artikull.
