Kryetari i Partisë Demokratike, Lulzim Basha u ka bërë thirrje qytetarëve që të dalin masivisht dhe të votojnë më 25 prill, gjatë një interviste në një emision televiziv mëngjesi.
Sipas tij, këto zgjedhje do të kenë pjesëmarrjen më masive që është parë në këto 30 vite demokraci. Po ashtu, Basha parashikoi një fitore masive të opozitës.
I pyetur se çfarë do të ndodhë me borxhin që Shqipëria i ka Francesco Becchetti-t, nëse Partia Demokratike vjen në pushtet, Basha tha se “fatura” do të paguhet me pasuritë e kryeministrit Edi Rama, kryebashkiakut Erion Veliaj dhe Engell Agaçit.
Lideri demokrat tha se dëmi është shkaktuar nga sjellja e kryeministrit, kryebashkiakut dhe Sekretarit të Përgjithshëm. Për këtë, shtoi ai do të bashkëpunohet me Europol dhe organizata të tjerë ndërkombëtare për të ngritur mekanizma e për të gjurmuat pasuritë e tyre. Basha shtoi po ashtu se do hartohet një ligj i posaçëm, dhe dëmet e shkaktuara do jenë përgjegjësi financiare e atyre që i kanë shkaktuar me vetëdije.
“Është një dëm i shkaktuar nga sjellja e kryeministrit, kryetarit të bashkisë Tiranë dhe Sekretarit të Përgjithshëm të Kryeministrisë. Dëmi ka përgjegjësi personale, siç e kam thënë dhe do të adoptojmë të njëjtat norma. Nuk do të paguhen nga taksat e qytetarëve, por do të jetë përgjegjësi individuale e atyre të treve. Do të bashkëpunojmë me Europol dhe organizata të tjerë. Do të ngremë mekanizma për të gjurmuar pasuritë e tyre kudo të ndodhen, në banka offshore”, tha Basha.
Kryedemokrati ripërsëriti propozimin e tij për kufizimin e qeverisjes së një kryeministri me 2 mandate. Kreu i opozitës argumentoi se nëse një kryeministri nuk arrin të realizojë planet e tij në 8 vite, nuk i realizon dot më.
“Funksionimi i Parlamentit si një instrument të kontrollit të qeverisë. Funksionimi i opozitës, liria e medias. Garancia e gazetarit. Dhe ka një instrument tjetër që është propozimi im dhe që do të bëhet realitet. Që është kufizimi i mandatit të kryeministrit, në vetëm dy mandate. Ju e dini se atë që nuk bën dot për 8 vite nuk e bën dot as për 4 të tjera. Ky është një rregull në një nga demokracitë më të përparuara të botës. SHBA e ka kështu dh duhet të jetë rregulluar për shqiptarët. Ky do të jetë një nga amendamentet e para që unë do të kaloj”, tha Basha, në “ABC e mëngjesit”.
