Pirlo: Ia bëmë të vështirë vetes, do e mendoj pozicionin e CR7

Andrea Pirlo, trajneri i Juventusit, pas fitores me përmbysje kundër Parmës ka folur për Sky Sport Italia. “Ia bëmë vetes jetën e vështirë me golin e pësuar, pastaj rrezikuam. Të vjen keq, por reaguam dhe luajtëm mirë për ta përmbysur ndeshjen. Ishte shumë e rëndësishme për besimin kjo fitore. Duhet t’i merrnim tre pikët në shtëpi dhe ia dolëm.

Ne kemi lojtarë instinktivë, por duhet t’u japim edhe udhëzime për pozicionet që duhet të mbajnë. Ata e bënë diçka të tillë më mirë në pjesën e dytë. Ishim shumë larg njëri-tjetrit në pjesën e parë dhe kjo i ngadalësoi lëvizjet pasuese. Problemi tjetër është përqendrimi dhe ritmi nga ndeshja në ndeshje. Ndonjëherë jemi të ngadaltë, mbajmë topin dhe lejojmë që kundërshtari të mbyllë hapësirat”.

Ronaldo sërish nuk e bëri mirë detyrën e tij për të qëndruar në mur gjatë goditjeve të dënimit, sikurse edhe ndaj Portos. Pirlo u ngacmua për këtë, teksa iu tha a do të hiqet CR7 nga ajo detyrë. “Për fat të keq këto gjëra ndodhin, por do ta vlerësojmë në ditët në vazhdim”.

LEXO EDHE  VIDEO/ Roveshata në Copa Libertadoree bëhet “hit”, Vidal shënon golin e karrierës

“European Super League? Agnelli ka shpjeguar se çfarë po ndodhte, por gjëja më e rëndësishme është të sigurojmë një vend në katër të parat për t’u kualifikuar në Champions League. Ai na inkurajoi para kësaj ndeshje. Kam folur me presidentin dhe drejtorin.

Të gjithë dimë të njëjtat gjëra. Diçka duhet të ndryshohet në nivelin europian. Idetë e propozuara ishin të mira, por ne gjithashtu duhet të jemi të hapur për sugjerime të tjera dhe të respektojmë rregullat”, ka përfunduar Pirlo deklaratën e tij.