Zbardhen detaje nga dëshmia e dhënë para oficerëve të policisë së Elbasanit nga Arbër Papleka, i cili dyshohet si një nga autorët e ngjarjes së ndodhur në Elbasan, ku mbeti i vrarë me armë zjarri Pjerin Xhuvani dhe u plagosën 3 persona të tjerë, 1 prej të cilëve një efektive policie.
Papleka, mësohet se ka deklaruar para policisë, se i është kundërpërgjigjur me armë për vetëmbrojtje.
Sipas burimeve, mësohet se Papleka ka treguar detaje nga ngjarja, ndërsa ka akuzuar Xhuvanin dhe grupin që e shoqëronte se e kanë kërcënuar dhe i kanë qëlluar të parët me armë zjarri.
Nga raportimet mësohet se ngjarja ka ndodhur në lagjen 5 maji.
Disa minuta pas ngjarjes, autori i dyshuar është vetëdoruar në polici, ndërsa ende nuk dihen zyrtarisht motivet.
Më herët, në një deklaratë për mediat, drejtuesi politik i PD në Elbasan, Gazment Bardhi tha se nuk ka shumë informacione mbi ngjarjen.
“Makina që shikoni atje është e mbushur me karta identiteti dhe para e drejtuar nga prej ekspenonteve të krimit te organizuar dhe trupin e shihni vete atje. Kaq kam për të thënë, janë një grup personash, shtabi elektoral i vërtetet i Taulant Ballës”, u shpreh Bardhi për mediat.
