Pesë persona kanë mbetur të plagosur me thikë në xhaminë te “Rruga e Kavajës” në Tiranë, këtë të Hënë.
Të plagosurit raportohet se ndodhen jashtë rrezikut për jetën, ndërsa autori Rudolf Nikolli, është vënë në pranga.
Të plagosurit janë “Donald Koçi, rreth 35 vjeç, Saba Peposhi, rreth 22 vjeç, Mariglen Konja, rreth 24 vjeç, Kleon Jaupaj, rreth 26 vjeç dhe Anri Tola, rreth 23 vjeç”, njoftoi policia.
Ngjarja ndodh teksa besimtarët myslimanë janë në muajin e Ramazanit.
Ngjarja
Policia njoftoi se, rreth orës 14:30, në Rrugën e Kavajës, një shtetas është futur në ambientet e xhamisë dhe në rrethana ende të paqarta ka plagosur me mjet prerës 5 shtetas.
Rudolf Nikolli 34 vjeç, nga Burreli, u arrestua si autor i ngjarjes.
Ndërkohë, shërbimet e Policisë iu kanë dhënë ndihmën e parë shtetasve të lënduar, të cilët janë transportuar në spital, për ndihmë mjekësore dhe ndodhen jashtë rrezikut për jetën
Në vendngjarje ka mbërritur grupi hetimor dhe nën drejtimin e Prokurorisë vijon puna për sqarimin e rrethanave dhe dokumentimin e plotë ligjor të ngjarjes.
Raportohet se agresori nuk ishte frekuentues i xhamisë. Mbetet i paqartë nëse ai vuan nga probleme të shëndetit mendor, apo kemi të bëjmë me një sulm terrorist.
Lexo edhe:
FOTO/ Plagosja e 5 personave në xhami, ja kush është autori (FOTO)
