Kreu demokrat, Lulzim Basha, ka vijuar fushatën elektorale në Shijak, i cili ishte ndalesa e 5-të që nga mëngjesi i sotëm.
Basha nisi serinë e takimeve në Sarandë për të vijuar me Delvinën, Tepelenën dhe Levanin, ndërsa në mbrëmje pritet të përmbyllë takimin e 9 në Tropojë.
Kreu demokrat ka përcjellë mesazhin e bashkimit të shqiptarëve, duke ftuar edhe socialistët t´i bashkohen ndryshimit më 25 prill.
Basha ka kërkuar ndëshkimin me votë të Edi Ramës, që sipas tij, mashtroi shqiptarët për 8 vite dhe nuk mbajti asnjë premtim. Kreu demokrat tha se nuk mund të ndodhë ndryshimi pa largimin e Ramës, ndërsa kërkoi që mashtruesit të mos i hapet dera për herë tretë.
Mes entuziazmit të qytetarëve, që e pritën me thirrjet “Rama ik”, Basha tha se ka parë shpresën te çdo qytetar që ka takuar, duke shtuar se shqiptarët mezi që po presin 25 prillin.
“Bashkë për ndryshim, ju jeni forca dhe shpresa për ndryshimin e madh”, tha Basha, i cili shtoi se Edi Rama nuk u kujtua një ditë, ndërsa i braktisi qytetarët në ditën e tyre më të vështirë. Kreu demokrat akuzoi Ramën se po shantazhon qytetarët me rindërtimin.
“Iu them atyre skuthave që dalin natën se nuk keni asnjë shans të tjetërsoni vullnetin e qytetarëve. Pas 25 prillit ju pret burgu”, tha Basha. Sipas tij, në Durrës dhe Shijak kanë ndodhur abuzimet më të mëdha me rindërtimin, ndaj dhe më 25 prill jepini ujë me bisht të lugës këtij mashtruesi, Edi Ramës.
“Vendimi më 25 prill, vota për nr 9. Vota për ndryshim do të thotë votë për transparencë, do të thotë përshpejtim të procesit të rindërtimit të marrë peng nga Edi Rama dhe mafia e tij. Duke votuar nr 9, ne do të bëjmë të mundur që Shijaku të kthehet në kryeqendrën e panaireve bujqësore për Tiranën dhe Durrësin”, tha Basha.
