Presidenti Ilir Meta ka ngritur akuza të ashpra ndaj drejtuesit politik të PS-së së Vlorës, Damian Gjiknuri, për blerje votash, ndërsa tha se do të ndalojë çdo tërmet të ngjashëm me atë të Dibrës në qytetin bregdetar. Madje Presidenti e ftoi Gjiknurin edhe në një debat publik.
Gjiknuri ishte i ftuar në studion e Breaking, nga ku tha se po e takova Ilir Metën, e blej, meqë qenkam kaq magjistar sa më akuzojnë mua për Luan Ramën.
“Nëse presidenti deklarohet se ai është lideri i qarkut të opozitës, unë madje do të shkel edhe rregullin e vendosur nga partia dhe përballen, sepse ne kemi prioritet të takohemi me njerëzit. Nëse ai pranon se ai është kryetari i opozitës, jam lideri i opozitës në Vlorë, e nuk jam në cilësinë e Presidentit, por për të drejtuar opozitën në Vlorë, atëherë unë jam i gatshëm për debat për të biseduar në lidhje me problemet dhe çfarë kemi realizuar ne për këtë qytet”, tha Gjiknuri.
Drejtuesi politik i PS-së për Vlorën, Damian Gjiknuri, shfaqet në përgjimet e publikuara nga Bild në atë që njihet si dosja 184 dhe që jepen fakte mbi manipulimin zgjedhor në Dibër. Gjiknuri shprehet entuziast për tërmetin elektoral që u shkaktua në zgjedhjet e pjesshme lokale të Dibrës, ndërsa fliste edhe për “çunat problematikë”.