Një shqiptar me origjinë nga Kosova është shpallur fajtor për tentativë vrasjeje me dashje dhe u denua me pesë vjet dhe dy muaj burg nga Gjykata e Zyrihut.
Gjithçka filloi si një mosmarrëveshje e zakonshme trafiku para semaforëve dhe përfundoi me goditje të rrezikshme me thikë. Të hënën, E.T. 56 vjeçar nga Adliswil është përgjigjur para gjykatës së Qarkut në Horgen të Zyrihut dhe është dënuar me pesë vjet dhe dy muaj burg, shkruajnë gazetat zvicerane, si NZZ, Tages Anzeiger, Blick etj.
Shtetasi zviceran me prejardhje kosovare akuzohej se pas një mosmarrëveshjeje me një motoçiklist, ka nxjerrë thikën dhe ka qëlluar personin në fjalë.
Në gjykatë ai tha se ishte penduar. “Ishte gabim imi. Unë kisha frikë prej tij,” thotë kosovari i dënuar, duke shpjeguar arsyen përse kishte mbajtur thikën në dorë. “Unë i thashë që të mos afrohej më afër”. Pastaj ai, e goditi me thikë për të zmbrapsur sulmin.
Por, videot e marra nga vendi i ngjarjes, që janë treguar në gjykatë, nuk mbështesin versionin e vetëmbrojtjes.
