Nga Boldnews.al
Kohë fushate, edhe pak ditë mbesin nga dita e zgjedhjeve më 25 prill. Të ndodhur ngushtë nën monitorim ndërkombëtar, trafikantët e lidhur me pushtetin e kanë paksa të vështirë të dalin hapur për tu kthyer në kultivuesit e drogës që të sjell para të shpejtë dhe “pushtet të përhershëm” sa kohë vendi drejtohet nga Rilindja. Por çunat problematik, janë pjellorë në mendime. Magazinat i kanë kthyer në shtëpi hashashi. I tillë është drejtori i Kadastrës në Laç, Edmond Stojani.
Kishte në duar çdo pronë të zonës, me rrogë të mirë, me benefite të tjera ku korrupsioni dhe alleshverishi janë mijeti në duart e Rilindjes, por sërish ishte i pakënaqur. I hanin duart për punë “bujqësie” dhe vendosi të kthejë magazinat në shtëpi hashashi.
Ai është shpallur në kërkim, ndërsa nipi i tij u arrestua brenda magazinës ku po kultivohej dhe rritej me ujin e bekuar të Rilindjes 205 bimë kanabis. Edhe në këtë rast dyshohet se dikush e dekonspiroi operacionin policor, duke i kthyer duarbosh efektivët dhe drejtori i madh kushedi se ku bredh, mbase në kërkim të votave të pushtetit.
Nuk është një rast i izoluar, por mënyrë qeverisëse për Ramën. I kërkon me qiri trafikantët, i nevojiten për ti sjellë dhe mbajtur pushtetin dhe në fund i shpërblen me poste të larta. Dikur i kishte në Parlament, ndërsa sot u ka dhënë çdo kontroll të mundshëm në administratën e lartë shtetërore.
Me kanabisin e vitit 2016-2017, Rama mori zgjedhjet. Shumë para u derdh, ndonëse mbante erë marijuanë, për Rilindjen ajo kishte “aromën” më të mirë, pushtetin. Tashmë e ka paksa të vështira ta legalizojë kanabisin, por për ta “hipotekuar” i ka të gjitha në duar. Këta janë djemtë e Ramës. Dikush tjetërson prona, një tjetër edhe detin e kthen në truall për oligarkinë. Janë djem që “të marrin gjak në vetull”-thonte një eksponent i rëndësishëm i PS-së.
Këta marifetçinj me shumë para të pisët në duar janë shfaqur dendur kudo në vend. Votat i kërkojnë me çdo mjet gjithnjë për hambarin e Rilindjes. Kërkojnë Shqipërinë e gjëlbër, atë të kanabisit që kultivohej me dijeninë e plotë e drejtuesve të policisë. Sot kushdo që është majmur me trafiqe dhe korrupsion është thirrur për të kontribuuar për Rilindjen, këtë sekt politik që u rrit nga duhma e hashashit dhe haluçinacioni i “pushtetit të përjetshëm” të atij të madhit!
