Ndonëse në disa shtete është kërkuar që vaksinat të kryqëzohen duke mos marrë doza të njëjta të vaksinave, Organizata Botërore e Shëndetësisë e kundërshton këtë fakt.
Nga një anketim i bërë, 71 % e qytetarëve të cilët e kanë marrë një dozë nga AstraZeneca kërkojnë që dozën e radhës ta kenë nga një prodhues tjetër.
Por zëdhënësja e OBSH-së, Margaret Harris iu referua një rekomandimi paraprak të një paneli ekspertësh të OBSH-së të bërë në muajin Shkurt. Sipas atij rekomandimi të dyja dozat duhet të injektohen nga e njëjta vaksinë.
Ekspertët kanë bërë thirrje për më shumë hulumtime për të kontrolluar përdorimin e një përzierje të vaksinave.
Në Gjermani ekziston një farë presioni për të përdorur një lloj të tillë imunizimi, pasi personat nën 60 vjeç nuk po marrin më vaksinën AstraZeneca, për shkak të frikës nga rreziku i mpiksjes së gjakut.
Sipas ministrit gjerman të Shëndetësisë, Jens Spahn, megjithatë 2.2 milionë qytetarë nën 60 vjeç kanë marrë tashmë një dozë të vaksinës AstraZeneca.
“Pa të dhëna të mjaftueshme për rreziqet e mundshme, nuk duhet të ketë vaksinim të dytë me vaksina të tjera“, tha Eugen Brysch, anëtar i bordit të Fondacionit Gjerman për Mbrojtjen e Pacientëve.
Në deklaratat e saj, Margaret Harris i tha agjencisë DPA se nuk ka ende të dhëna të mjaftueshme mbi rreziqet e mundshme, nëse një person merr dozën e parë të vaksinës AstraZeneca ndërsa të dytën të ndonjë prodhuesi tjetër.
