Kukësi po ecën në ujëra të trazuara dhe nesër do të përballet me Kastriotin, një sfidë që do të thotë shumë për verilindorët të cilët rrezikojnë të rrëshkasin në zonën playoff të rënies nga Kategoria Superiore. Trajneri Mirel Josa pret nga skuadra të reagojë pasi sipas tij Kukësi po humbet shumë si në renditje ashtu edhe në prestigj.
“Kemi pasur shumë humbje gjatë rrugës, qoftë për prestigjin e skuadrës, por edhe për renditjen. Duhet t’i shikojmë ndeshjet me kë luajmë dhe kë kemi përballë. Kastrioti është një skuadrës shumë e fortë, ka karakter, e ka treguar edhe në ndeshjet e tjera, kështu që duhet të jemi shumë të kujdesshëm sa i përket ndeshjes.”
Problemi sipas trajnerit të verilindorëve është goli dhe efikasiteti që I mungon shumë skuadrës në fushë.
“Ne duhet të çlirohemi psikologjikisht sa i përket minutës sesi skuadra del në sulm, te zona e kundërshtarit. Në sulm nuk e kemi forcën e duhur për të goditur kundërshtarin. U duk edhe ndaj Skënderbeut kjo, në pjesën e parë kishim 5 raste për të shënuar dhe të kalonim në avantazh. Në futboll duhet të jesh sa më efikas ë mënyrë që edhe loja të marrë pozitivisht për ty”, deklaroi trajneri Mirel Josa në media përpara duelit me Kastriotin.
