Gazetari Agim Baçi, i cili kandidon për deputet për Partinë Demokratike dhe koalicionin e drejtuar prej saj në Qarkun e Durrësit, thotë se kryeministri Edi Rama po zhvillon një fushatë negativiste.
I ftuar në Ora News, Baçi thotë se pasi i kërcënon shqiptarët me jetë për vaksinat, i ka mbetur vetëm tu thotë që po erdhi në pushtet opozita nuk do të ketë më marrëdhënie seksuale në çift.
“PS ka qenë në opozitë këto vite si partitë e tjera. Rama ka zgjedhur një kastë personale që e ka quajtur Rilindje. Sot kemi një kastë drejtuesish kaq personale dhe kjo shpjegon dhe ligjërimin e zotit Ramës që kërcënon, vetëm shan, vetëm hakërrehet. Ka mbetur vetëm tu thotë shqiptarëve që nëse fiton opozita do të ndalohet dhe seksi pas 25 prillit, se vaksinat po, legalizimet po, rrogat po, ekonomia po. Ka mbetur tu thotë se nuk ka vetëm seks, familjet shqiptare do të vuajnë nga kjo gjë”, thotë Baçi.
Baçi thotë se Lulzim Basha nuk po merret me Edi Ramën, por me programin dhe alternativën që ka për shqiptarët, si kryeministër i ardhshëm i tyre.
“Me sa kam ndjekur fushatën në terren, PD dhe Basha nuk është marrë me zotin Rama.Është një strategji shumë e mirë. Ai që e sheh vetëvetën si kryeministër të ardhshëm të shqiptarëve duhet ti shpjegojë atyre se çfarë do të bëhet me ekonominë. Ka shumë pyetje si do të gjenden paratë? Nëse kthehet shteti ligjor, llogaridhënia, shpirti publik për të debatuar gjërat që na duhen bashkërisht unë them se çdo gjë është e mundur”, tha Baçi.
