Rrëzohet fleta e votimit e miratuar nga Komisioni Qendror i Zgjedhjeve. Komisioni i Sanksioneve dhe Ankesave vendosi me shumicë votash në favor të Partisë Socialiste, duke miratuar fletën e votimit pa emrat e kandidatëve, siç e kërkon PS.
Më herët, KQZ miratoi fletën e votimit për zgjedhjet e 25 Prilli – horizontale dhe me emrat e kandidatëve për deputetë.
Si PS ashtu dhe PD ankimuan vendimin. Demokratët kërkuan që fleta të ishte vertikale dhe mbështetën opsionin me emrat e kandidatëve në fletë. PD u shpreh se identifikimi me emër i kandidatit do të ndihmojë në zgjedhjet e kandidatit të preferuar.
Socialistët ndërkohë, kërkuan që të hiqeshin emrat e kandidatëve për deputetë në fletën e votimit dhe në vend të tyre të tyre të viheshin numra. Eridjan Salianji përfaqësuesi i PS në KQZ, tha se “fleta e votimit me emra shkakton vonesa në votim dhe numërim”.
Këtë të Shtunë, KAS vendosi në favor të Partisë Socialiste.
Ndërkohë, mësohet se Partia Demokratike do të apelojë vendimin në Kolegjin Zgjedhor.
