Kryeministri Edi Rama është bërë sërish përcjellës i lajmeve të rreme – këtë herë për vaksinën kineze.
Kreu i qeverisë ka folur me superlativa për vaksinën kineze që po aplikohet në vendin tonë, ndërsa është akuzuar se po përdor vaksinimin me “Sinovac” – një vaksinë e cilësuar me siguri dhe efektivitet të dyshimtë – për qëllime elektorale.
Këtë të Shtunë, dita që shënoi nisjen e vaksinimin për punonjësit e Policisë, Rama citoi një shkrim nga “New York Times”, që siç tha kreu i qeverisë, raporton se vaksina kineze është e para për efiçente.
“Dje, kishte nxjerrë ‘New York Times’-i një artikull bazuar në të dhënat globale të efiçencës së vaksinave, kjo vaksinë ishte e para”, deklaroi Rama.
Por deklaratat e kreut të qeverisë edhe këtë herë janë të gënjeshtra. Siç shpjegon agjencia prestigjioze e lajmeve “AFP”: “Pretendimi se gazeta amerikane ‘The New York Times’ dhe transmetuesi gjerman ‘Deutsche Welle’ kanë mbështetur vaksinat e Kinës për Covid-19 është shpërndarë në shumë postime në FB, së bashku me një listë që pretendon se katër vaksinat më të sigurta për Covid-19 në botë janë të gjitha të prodhuara nga kinezët. Postimet janë jo të sakta”.
“Ato citojnë një opinion të New York Times (në Shkurt dhe jo dje siç tha Rama) dhe referojnë një artikull të lajmeve Deutsche Welle në tetor 2020 që renditi vaksinat Covid-19 që ishin atëherë në provat klinike të fazës së tretë. As pjesa e opinionit dhe as artikulli i lajmeve nuk renditën sigurinë e vaksinave Covid-19”, sqaron AFP (dhe as efiçencën).
Lidhur me artikullin e gazetës amerikane, AFP sqaron se:
New York Times publikoi një artikull me titull “Është koha të besojmë te vaksinat kineze dhe ruse” që u botua si një ese mendimi në 5 shkurt 2021 nga Achal Prabhala dhe Chee Yoke Ling. Gazeta identifikoi Prabhala si një aktivist indian të shëndetit publik dhe Chee si një avokat të interesit publik Malajzisë.
Artikulli nuk ishte një miratim editorial i NYT dhe as një pjesë e raportimit nga korrespondentët e stafit të gazetës.
New York Times publikoi një deklaratë në Twitter më 10 Mars 2021 duke thënë se ishin në dijeni të mesazheve çorientuese që qarkullonin në internet.
“….Raportimi ynë nuk ka sugjeruar që vaksinat kineze janë më superiore se vaksinat e prodhuara diku tjetër…”, thuhet në deklaratën e gazetës në Twitter.
Artikulli i News York Times, përveç se është përmendur nga Rama këtë të Shtunë, është publikuar dhe nga media që njihen për pozicionimin e tyre krah qeverisë.
