Vëllai i reperes Loredana, është dënuar me burgim në Zvicër. Gjykata Penale e ka dënuar menaxherin për falsifikim të dokumenteve, përpjekje për shantazh dhe përgjime të shumta dhe regjistrim të bisedave, shkruan gazeta Express.
40-vjeçari, ka shantazhuar një artist, trashëgimtar i një konteshe të pasur nga Lucerni, me regjistrime të fshehta zanore. Për këtë dhe për falsifikim, ai është dënuar me 2 vjet burgim, 9 muaj nga të cilat duhet t`i mbajë, pjesën tjetër me kusht, shkruan zentralplus.ch. dhe blick.ch.
Kontesha i kishte lënë të birit trashëgimi një pasuri të konsiderueshme. Ai ka jetuar për vite me radhë në hotelin luksoz të Lucernit, “Monopol”, dhe ka punuar si artist deri në fund të jetës së tij. Për të promovuar pikturat e tij dhe për t’i prezantuar ato në ekspozita, ai mori një menaxher dhe doli se kishte marrë vendim të gabuar.
Sipas zyrës së prokurorit publik, kosovari kishte një “marrëdhënie biznesi afatgjatë” me artistin.
Si menaxher, ai ka kryer detyra të ndryshme për artistin, ndër të tjera, i ka organizuar atij një intervistë në televizionin kosovar.
Në një moment, marrëdhënia e tyre u prish. Kështu, menaxheri iu kthye bordit të arbitrazhit duke pretenduar se artisti kishte pagesa të papaguara ndaj tij. Ai kishte prezantuar një “pranim të borxhit” për 480,000 euro dhe 40,000 franga, të cilat, sipas tij, i kishte nënshkruar artisti.
Artisti e ka mohuar gjithë kohën të ketë nënshkruar këtë letër. Origjinali i letrës është gjetur përfundimisht gjatë një bastisjeje në ambientet e shtëpisë së menaxherit. Sipas një raporti nga Instituti i Mjekësisë Ligjore Cyrih, kjo letër duket të jetë e rreme.
Prokuroria publike më tej akuzon kosovarin për incizimet e fshehta zanore të bisedave që artisti kishte pasur me palë të treta. Pastaj mbi bazë të tyre ai është përpjekur ta shantazhonte me të.
Artisti ndërkohë ka ndërruar jetë dhe rrethanat e sakta të vdekjes së tij nuk dihen.
