Ish-kryeministri Sali Berisha ka përkujtuar 2 Prillin, ditë në të cilën 4 heronj të demokracisë u vranë nga regjimi gjakatar.
Përmes një postimi në Facebook, Berisha shkruan se 30 vite më parë në mëngjesin e 2 prillit të vitit 1991, Ramiz Alia dhe klika e tij kryen në Shkodër, bastionin e antikomunizmit në Shqipëri dhe në Europë, një masakër të vërtetë.
Berisha shkruan se në këtë masakër ranë për tu bërë të pavdekshëm anëtari i kryesisë së Partisë Demokratike, Arben Broci dhe të rinjtë veprimtarë të PD, Bujar Bishanaku, Nazmi Kryeziu dhe Besnik Ceka si dhe u plagosen mbi 87 qytetarë të pafajshëm.
Postimi i plotë i Berishës:
Të dashur miq, 30 vite më parë në mëngjesin e 2 prillit të vitit 1991, Ramiz Alia dhe klika e tij kryen në Shkodër, bastionin e antikomunizmit në Shqipëri dhe në Europë, një masakër të vërtetë.
Pas grabitjes së zgjedhjeve të 31 marsit, si për të festuar fitoren e vjedhur me gjakun dhe jetët e të rinjve demokratë, falangat e krimit të diktatorit të fundit komunist shqiptar të komanduara direkt nga ai dhe ministri i tij Gramoz Ruçi, hapën zjarr ndaj protestuesve paqësorë dhe lanë Shkodrën me gjakun e bijve dhe qytetarëve të saj.
Në këtë masakër ranë për tu bërë të pavdekshëm anëtari i kryesisë së Partisë Demokratike, Arben Broci dhe të rinjtë veprimtarë të PD, Bujar Bishanaku, Nazmi Kryeziu dhe Besnik Ceka si dhe u plagosen mbi 87 qytetarë të pafajshëm.
Sot pas 30 vitesh, mbarë shqiptarët përulen me mirënjohje të pakufishme dhe nderimin më të thellë para kujtimit të ndritur dhe veprës së martirëve të 2 Prillit, të cilët ranë për tu bërë të pavdekshëm në protestën e tyre paqësore për votën e lirë.
Sot pas 30 vitesh, përsëri ne demokratët vazhdojmë të vendosur betejën tonë për idealet për të cilat flijuan jetën martirët e Shkodrës.
Sakrifica sublime e tyre është një kushtrim, thirrje për çdo shqiptar që i beson lirisë, të mbrojë me çdo sakrificë votën nga klika e narkotrafikantëve në pushtet, është frymëzim i pashtershëm për të vazhduar betejën tonë për fitoren PD-së me votën e lirë në zgjedhjet e 25 prillit!
Nderim përjetë martireve të 2 prillit! Fitore!
