Një sasi prej 49 kg kokainë është sekuestruar në Portin e Durrësit, njoftoi këtë të Enjte policia e qytetit bregdetar. Administratori i firmës ku do të shkonte ngarkesa me banane ku u gjet droga u vu në pranga. Lënda narkotike vinte nga Ekuadori.
Aksioni
Burime zyrtare bënë me dije se gjatë kontrollit të imtësishëm të ushtruar në disa kontenierë, u bë e mundur që në njërin prej tyre, i cili ishte i ngarkuar me banane dhe ishte nisur nga Ekuadori me destinacion Shqipërinë, për llogari të një firme me qendër në Maminas, me administrator S.Ç., të gjendej dhe sekuestrohej në cilësinë e provës materiale rreth 49 kilogramë lëndë narkotike e dyshuar kokainë.
Nga Seksioni për Hetimin e Narkotikeve në DVP Durrës u arrestua shtetasi S.Ç., banues në Sauk, Tiranë.
Aksioni që çoi në sekuestrimin e drogës dhe arrestimin e biznesmenit u kodua “Mersin”.
“Nën drejtimin e Prokurorisë së Rrethit Gjyqësor Durrës, vijon puna për dokumentimin e plotë të kësaj ngjarjeje, identifikimin dhe kapjen e autorëve të tjerë të përfshirë në këtë veprimtari kriminale. Për arsye hetimore nuk jepen detaje të tjera rreth operacionit. Materialet i kaluan Prokurorisë së Rrethit Gjyqësor Durrës, për veprime të mëtejshme”, njoftoi policia.
