Zbardhet intenerari i ngarkesës me banane ku mbrëmjen e djeshme u sekuestrua një sasi kokaine.
Burime pranë grupit hetimor bëjnë me dije se ngarkesa me banane u nis nga Guayaquil i Ekuadorit. Konteneieri më pas u transportua në rrugë detare tranzit në Spanjë dhe më tej në Mersin të Turqisë (qytet nga i cili mori emrin operacioni policor). Më tej, droga u transportua drejt Portit të Durrës, ku mbrëmjen e djeshme efektivë të policisë hapën kontejnerin ku ndodhej ngarkesa me banane dhe zbuluan sasinë prej 49 kg kokainë.
Të njëjtat burime pranë grupit hetimor bënë me dije se hetimet lidhur me rastin kishte nisur që prej një muaji dhe autoritetet shqiptare kanë bashkëpunuar dhe me agjenci ligjzbatuese të vendeve të huaja.
Kush është i arrestuari
Personi i arrestuar në Durrës, si administrator i frimës që kishte porositur ngarkesën me banane ku u gjet sasia e kokainës është Selim Çekaj.
Ky i fundit është administrator i firmës “Ecoalmax”, që sipas policisë kishte porositur ngarkesën ku u gjetën e sekuestruar në një kontejner në Portin e Durrësit 49 kg kokainë. Njëherësh babi i Arbër Çekajt, administratorit të firmës “Arbri Garden”, i cili është dënuar me 14 vite burg po për trafik kokaine.
Firma “Ecoalmax” ndodhet në zonën e Maminasit, që lidh Tiranën me Durrësin.
Duket se babë e bir, Selim dhe Arbër Çekaj kanë përdorur të njëjtën skemë për trafikimin e kokainës nga Amerika Latine, duke përdorur biznesin e bananeve për t’u kamufluar.
Vetë Arbër Çekaj i ka mohuar vazhdimisht akuzat dhe ka apeluar vendimin e dhënë nga GJKKO me 14 vite burg.
Aksioni
Burime zyrtare bënë me dije se gjatë kontrollit të imtësishëm të ushtruar në disa kontenierë, u bë e mundur që në njërin prej tyre, i cili ishte i ngarkuar me banane dhe ishte nisur nga Ekuadori me destinacion Shqipërinë, për llogari të një firme me qendër në Maminas, me administrator Selim Çekaj, të gjendej dhe sekuestrohej në cilësinë e provës materiale rreth 49 kilogramë lëndë narkotike e dyshuar kokainë.
Nga Seksioni për Hetimin e Narkotikeve në DVP Durrës u arrestua shtetasi Selim Çekaj, banues në Sauk, Tiranë.
Aksioni që çoi në sekuestrimin e drogës dhe arrestimin e biznesmenit u kodua “Mersin”.
