Personat e arrestuar këtë të Enjte nga policia e Tiranës pas hetimeve të SPAK, që çoi edhe në zbulimin e 18 bazave armatimi, akuzohen se kanë kryer atentate në këmbim të parave.
Janë tre ngjarjet për të cilët ata dyshohen.
Paris Prenga, Bledar Deda dhe Flor Abazi janë vënë në pranga, ndërsa Sokol Gjura dhe një tjetër person janë shpallur në kërkim.
Policia njoftoi se këta persona, së bashku dhe me dy persona të tjerë të arrestuar më parë, Ermond Jamaku dhe Enver Jamaku, dyshohet se janë autorë të ngjarjes së ndodhur më datë 18 tetor 2019, në Tiranë, ku është tentuar të vritet me eksploziv të telekomanduar Artjan Bylyku.
Shtetasi i shpallur në kërkim Sokol Gjura dyshohet se së bashku me dy persona të tjerë të arrestuar më parë, Ermond Jamaku dhe Enver Jamaku, janë autorë të sulmit me armë ndaj Paulin Peplekas, ngjarje e ndodhur më datë 10 shtator 2017, në rrugën “Muhamet Deliu” në Tiranë.
Gjithashtu, këta persona dyshohet se janë autorë të vendosjes së lëndës eksplozive, granatës dhe armës së zjarrit, si dhe të një lënde narkotike të dyshuar si heroinë në banesën e Edmond Saraçit, ngjarje e ndodhur më datë 15 shtator 2017 në Tiranë.
Lexo edhe:
VIDEO/ Zbulohen 18 baza armatimi në Tiranë. Të arrestuarit, autorë të disa atentateve
