Elseid Hysaj sërish në vorbullën e merkatos. Mbrojtësi i Kombëtares shqiptare ishte ndër më të mirët në fushë në dy ndeshjet ndaj Andorës dhe Anglisë, duke ngjallur edhe interesimin e skuadrave Europiane.
Kontrata në skadencë në fundin e sezonit aktual me Napolin e ka shndërruar shkodranin në një lojtar tepër interesant për çdo ekip.
Sipas asaj që raportojnë mediat italiane, në garë për shërbimet e tij gjenden 3 skuadra. Milan është pista që intrigon më tepër shqiptarin, me kuqezinjtë që shikojnë tek 27-vjeçari lojtarin ideal për prapavijën e sezonit të ardhshëm.
Në garë për të gjenden dhe dy skuadrat e tjera italiane, Roma dhe Lazio. Ekipet kryeqytetase gjenden prej kohësh në gjurmët e Hysaj që më shumë se kurrë po mendon të largohet nga Napoli.
