Kolegji Zgjedhor i hoqi të drejtën e kandidimit, Hajdarmataj: Pasojë e reformës zgjedhore, mbështes PD

Mimoza Hajdarmataj ka reaguar pas vendimit të Kolegjit Zgjedhor, i cii vendosi për çregjistrimin e disa prej kandidatëve të Partië Demokratike, me arsyetimin se në lista kishte më shumë emra nga sa parashikon Kodi Zgjedhor.

Në reagimin e saj Hajdarmataj, e cila ishte vendosur si kandidate në listat e PD për qarkun e Tiranës, thekson se pavarësisht se ajo nuk do të jetë në garë në këtë zgjedhje, do të mbështesë e të gjitha forcat Partinë Demokratike, për të sjellë ndryshimin në 25 prill.

Sipas Hajdarmatajt përjashtimi i saj nga gara dhe i disa të tjerëve vjen për shkak të të ashtuquajturës Reformë Zgjedhore, e cila u ngrit për interesa të caktuara politike.

Postimi i plotë i Hajdarmatajt:

Kolegji Zgjedhor sot, bashkë me disa të tjerë, më heq edhe mua të drejtën të garoj si kandidate për PD në zgjedhjet e 25 Prillit.

E ditur pak a shumë, por një ngjarje e shtuar në realitetin dekurajues të përditshmërisë sonë…

Pikësëpari dua ti shpreh falënderimet dhe mirënjohjen më të thellë mikeshave, kolegëve, farefisnisë dhe gjithë komunitetit tropojan, në Tropojën time të shtrenjtë dhe kudo në Tiranë, për përkrahjen dhe inkurajimin e pakushtëzuar, që më dhanë në nisje të kësaj sfide.

Nuk mund të mos shpreh keqardhje dhe zhgënjim që e famshmja Reformë Zgjedhor kombinuar dhe me taktika politike të interesave të caktuar, përjashton jo rrallë nga gara njerëz dhe veçanërisht gra e vajza potenciale, me kontribute dhe  aftësi të jashtëzakonshme, për ti dhënë politikave, një zë ndryshe edhe më të fuqishëm nga përvojat e deritanishme.

Megjithatë ndodhi çfarë ndodhi…

Unë personalisht do të mbetem plotësisht e angazhuar dhe e motivuar për t’i shkuar deri në fund sfidave për fitoren e  PD, si partia e bindjeve dhe vokacionit tim personal, që nuk ndryshon, qysh prej themelimit të saj!

Asgjë dhe askush nuk më demotivon e aq më tepër një pozicionim ose jo si kandidate në listë.

Miq,

Vetëm ndryshimi dhe fitorja e PD ka për të sjellë shpresë për familjet tona dhe një të ardhme europiane për Shqipërinë.

Për këtë jam e bindur prandaj do të jem aty së bashku me shumë e shumë të tjerë për ta bërë realitet.

#Voto9 #ShqipëriaFiton

LEXO EDHE  Osmani: Kosova është pro vazhdimit të dialogut më Serbinë