“Bashkia Vorë vijon abuzimet me procesin e rindërtimit”, u shpreh sot në emër të LSI-së, Vojo Bregu, i cili i ka bërë thirrje SPAK të nisë hetimet.
Bregu tha se qëllimi i abuzimeve është deformimi i votës së qytetarëve të kësaj bashkie.
“Në kundërshtim me ligjin, kjo bashki ka hartuar një listë totalisht të re me 244 banesa me pretendimin se janë prekur nga tërmeti i 26 nëntorit.
Kjo listë, i është dërguar para 10 ditësh për miratim Institutit të Ndërtimit me qëllimin e vetëm, përfitimin e dëmshpërblimit fiktiv pak ditë para zgjedhjeve të 25 prillit.
I bëjmë thirrje SPAK-ut që në këtë kohë të rëndësishmë për fatet e Shqipërisë, të angazhohet maksimalisht dhe seriozisht për zbardhjen e këtyre aferave elektorale me rindërtimin në Vorë dhe në të gjithë Shqipërinë.
Për SPAK, do të mjaftonte që oficerët e policisë gjyqësore, të shikonin fizikisht dosjet e rindërtimit, për të kuptuar që abuzimet me objekt tjetërsimin e votës së qytetarëve janë evidente”, tha Bregu.
Gjithashtu LSI i kërkoi KLSH, që të nisë urgjentisht një hetim administrativ, lidhur me shpërdorimin e parave te taksapaguesve shqiptare, për qëllime pastërtisht elektorale, jo vetëm në Vorë, por dhe në Kavaje, Durrës, Kruje, Shijak.
