Vetëm pas publikimit të një denoncimi nga ish-kryeministri Sali Berisha për fshehjen e rastit të arrestimit të një zyrtari në Lezhë, policia reagon duke konfirmuar ngjarjen.
Sipas denoncimit të publikuar nga ish-kryeministri, Agostin Gjini, zyrtar lokal dhe njeri i afërt me kryeministrin Edi Rama e kryebashkiakun e Lezhës Pjerin Ndreu, është arrestuar që pasditen e djeshme, por rasti po mbahej i fshehtë nga policia.
Pas publikimit të mesazhit në FB nga Berisha, mediat raportuan për arrestimin e Agostin Gjinit dhe në fund edhe policia u detyrua të reagonte për rastin.
“Specialistët e Seksionit të Krimit Ekonomik e Financiar në DVP Lezhë kanë ekzekutuar masën e sigurisë ‘Arrest në burg’ të vendosur nga Gjykata e Rrethit Gjyqësor Lezhë për shtetasin A. Gj., 56 vjeç, banues në Ishull Lezhë, për vepren penale ‘Falsifikimi i dokumenteve’. Ky person dyshohet se gjatë ushtrimit të detyrës si përgjegjës i Sektorit të Arkivit dhe Protokollit në Njësinë Administrative Shëngjin ka falsifikuar dokumentet, duke tjetërsuar sipërfaqe toke në bregdetin e Shëngjinit, nga lloji i pasurisë rërë në arë. Vijon puna për dokumentimin e plotë ligjor të kësaj veprimtarie kriminale dhe vënien para përgjegjësisë ligjore personave të tjerë te implikuar”, thuhet në njoftimin e policisë.
Kjo nuk ështe hera e parë që policia nuk raporton raste të caktuara dhe akuzat për fshehje të ngjarjeve kanë qenë të përsëritura.
