Replika mes gazetarit Arben Manaj dhe aktorit Robert Ndreka, imazhi i të cilit u përdor sërish nga kryeministri Edi Rama për qëllime elektorale.
Një ditë më parë, kreu i qeverisë publikoi një spot elektoral, ku shfaqej aktori Ndrenika që mbështeste Partinë Socialiste. Pas publikimit të videos që u shpërnda në ditën e hapjes së fushatës së PS, pati reagime të shumta kritike ndaj aktorit Ndrenika për pozicionimin e tij krah Ramës.
Vetë aktori zgjodhi ti përgjigjej një prej këtyre kritikëve, gazetarit Arben Manaj, duke i kujtuar pozitën e të atit në sistemin komunist.
Gazetari ka reaguar duke i kujtuar Ndrenikës se partia e re që ai mbështet, bëri zgjedhje (votimet e fundit lokale) njësoj si në shtetin komunist të Koresë së Veriut.
Reagimi i Ndrenikës
Në reagimin e tij, Ndrenika shprehej:
O Zot çfarë çudirash ndodhin në këtë botë! Djali i shokut Ali Manaj më shan se paskam bërë një spot për fushatën elektorale.
Nuk jam kundër, por vetëm se më shan nga Londra… Nga ore nga ?
Nga Londra! Në vitet 1967 dëgjova emisionin e fundit të Radio Londrës në gjuhën Shqipe …U mërzitëm se menduam që Anglia nuk po na përfill si popull.
Dhe sot ky ga…ruci më shan nga Londra!
Nuk do kisha thënë as gjysmë fjale po të më shante nga Pheniani se kështu do të preheshin të qeta eshtrat e shokut Ali Manaj (sekretar i parë në Gjirokastër) Perëndia të më ndjejë!
Reagimi i gazetarit
Në replikë, gazetari shprehej:
I dashur Robert,
Lexova me dhimbje sharjet dhe epitetet me organe mashkullore në adresën time, madje edhe mallkimet me ndjellje vdekje për babain tim! Thonë se nga këto të fundit të shtohet jeta!
Gjithsesi, unë kam respekt maksimal për ty si aktor dhe kaq, për të tjerat i ke në postimin tim ne FB!
Më pëlqeu referenca ndaj Phenianit, vendi i cili bën votime pa asnje parti, sic beri partia jote e re e cila e imitoj Phenianin në zgjedhjet e fundit lokale, pasi partia jote e vjetër është PD-ja, deputet i së cilës ju krenarisht keni qenë!
Babai im më lejon t’ju informoj nuk ka vdekur dhe është gjallë e shumë mirë në Londër, edhe pas mallkimit tënd, dhe ka bërë edhe vaksinën, jo si personalitet, siç bëhen në Shqipëri!
Nuk i kam thënë që më ke sulmuar si në kohen e tij, nga pozicioni i luftës së kllasave!
Por jam i sigurt se do gëzohet shumë që një njeri si ju që keni qene “me njollë” në biografi në kohën e karrierës së tij politike gjatë komunizmit, ka lënë PD që ai e urren, dhe është futur ne partine e tij!
Është fiks, siç thoni ju ne postimin sharës-mallkues: “O Zot çfarë çudirash ndodhin në këtë botë”!
Një ish-deputet i PD-se antikomuniste, në të njëjtën parti me Ish-Kryetarin e Parlamentit Shqiptar në kohën e komunizmit!!!
Ai kënaqet pa masë duke parë në satelit filmat e realizmit socialist në Digitalb, ku ju i Madhi Robert Ndrenika, keni shkëlqyer me klasin tuaj të aktrimit ndaj te cilit unë si shume shqiptarë, përulem me shumë respekt!
Dhe vetëm për kaq, jo me shumë!
