Familjarët e Arjan Salës kanë apeluar për ndihmë mbrëmjen e sotme për gjetjen e trupit të Arjan Salës, i cili prej 3 ditësh është i bllokuar në magazinën e djegur në Tiranë.
Xhaxhai i të riut bëri thirrje të gjithë personave që dinë si të realizojnë operacione kërkim-shpëtimi të vijën që nesër të ndihmojnë për të gjetur të paktën disa kocka të nipit të tij.
Duke folur mbrëmjen e sotme nga vendngjarja, apeli për ndihmë i xhaxhait iu drejtua edhe kryeministrit, presidentit, ministrave, deputetetë që të bëjnë diccka për nipin e tij, që ai e quan një hero.
“Mirëmbrëma i nderuar kryeministër i Shqipërisë, president, deputetë, ministra dhe drejtorë, ju lutem të gjithë krahëve politikë na vini në dispozion pak minuta nga koha juaj. Nipi im, djali i vëllait është bllokuar në magazinë. Që në fillim operacionin për nxjerrjen e tij u nis gabim. Paradite sot zjarri është shuar. Temperatura në katin e nëndheshëm është ulur ndjeshëm. Ju bëj thirrje publike të gjithë shqiptarëve që kanë humbur fëmijët e tyre të na përkrahin, të vijnë të qëndrojnë me ne këtu. Rezultat mbi trupin, eshtrat e nipit tim nuk ka.
Tani dhe mbrapa duhen kërkime të specializuara, nuk duhen kërkime nga njerëz jo profesionistë. Nëse ka njerëz në mënyrë vullnetare që e kanë idenë si bëhen kërkime, të vijnë dhe të japin ndihmesën e tyre. Të gjejnë diçka nga trupi i Janit. Do të vazhdojmë derisa të kemi diçka nga trupi i Janit. Ai ra hero se nxori gjallë disa njerëz dhe sakrifikoi veten. Një heroi të heshtur nuk duhet ti fshihet emri. Kërkoj ndihmë publike nga të gjithë. Ju mirëpresim që nga dita e nesërme në mëngjes, ju lutem mos e neglizhoni thirrjen time”, tha xhaxhai i Arjan Sales.
