Franck Kessie gjithnjë e më larg Milanit. Mesfushori ka edhe një vit kontratë me kuqezinjtë, por kjo ka vënë në lëvizje drejtuesit e skuadrës nga Milano, të cilët kanë nisur tentativat për të bindur 24-vjeçarin për të rinovuar. Megjithatë, kontakti i parë mes palëve nuk ka shkuar ashtu siç duhet. Agjenti i futbollistit ka kërkuar rritje të pagës neto të futbollistit në 4.5 nga 2.2 milionë euro që Kessie përfiton aktualisht.
Gjithsesi, kjo shifër nuk ka bindur drejtuesit të cilët nuk janë të gatshëm të tejkalojnë më shumë se 3 milionë euro pagë në vit për futbollistin nga Bregu i Fildishtë. Mesfushori është shndërruar në një lojtar kyq te Milani i këtij sezoni, ku në 27 paraqitjet e tij në kampionat ka shënuar 9 gola dhe dhënë 4 asiste.
Kjo ka tërhequr vëmendjen e skuadrave jashtë Italisë, kryesisht ato të Premier League angleze, por “djalli” nuk dëshiron të heq dorë prej tij, edhe pse aktualisht nuk ka një ‘tym të bardhë’. Sidoqoftë, kuqezinjtë janë optimistë dhe shpresojnë të arrijnë një marrëveshje sa më shpejt të jetë e mundur.
