Ashtu siç pritej, kompania franceze “Voltalia” është shpallur fituese e ankandit për ndërtimin e impiantit fotovoltaik të Spitallës.
Ministrja e Infrastukturës dhe Enrgjisë, Belinda Balluku, deklaroi këtë të Enjte se “Voltalia” kishte propozuar shitjen e një megavati me 29.99 Euro, si çmim për energjinë që do të parablihet nga OSHEE. Për këtë procedurë, ministria kishte vendosur një çmim tavan prej 55 euro/MËh dhe kompanitë mund të ofronin nën këtë fashë për pjesën e energjisë që do të parablihet nga OSHEE, 70 përqind. Në hapjen e ofertave nga Ministria e Infrastrukturës dhe Energjisë u nënvizua se pjesëmarrëse në ankand ishin të paktën pesë kompani por vetëm dy prej tyre ishin kualifikuar për përmbushjen e kushteve tekniko-ligjore dhe që mund të kishin edhe një ofertë financiare.
Kompania franceze “Voltalia”, që më herët është shpallur fituese edhe e ankandit për dnërtimin e parkut fotovoltaik të Karavastasë, është përfolur si fituese e paracaktuar e këtij ankandi.
Gazetari Klodian Tomorri, në një artikull të publikuar në media dy ditë më parë, shkruante se pas ankandit për parkun e Karavastasë, “filluan të dilnin zëra se kompania franceze ishte penduar për çmimin e ofruar dhe gjatë diskutimeve për firmosjen e kontratës kishte kërkuar kompensim”.
Ai hedh dyshime se në vazhdon e pretendimeve të komoanisë franceze ka pasur një marrëveshje të fshehtë për shpalljen fituese të “Voltalia-s” në ankandin për ndërtimin e impiantit fotovoltaik të Spitallës.
Sipas gazetarit, lidhur me këtë temë, kryeministri Edi Rama u takua disa ditë më parë me Presidentin Francez Emuanuel Makron.
