Partia Demokratike nis sot zyrtarisht hapjen e fushatës për zgjedhjet e 25 prillit, ndërsa disa qindra mbështetës të opozitës së drejtuar nga Lulzim Basha janë mbledhur në sheshin Nënë Tereza.
Pak minuta më parë sheshi në fjalë u mbush nga makinat e mbështetësve të PD, që mbanin simbolet dhe flamujt e kësaj partie. Ky ishte një prej detajeve që është përdorur nga kandidati demokrat Joe Biden në zgjedhjet e fundit presidenciale në SHBA.
Mitingu i hapjes së fushatës, ku priten të prezantohen kandidatët e koalicionit opozitar, shënon dhe nisjen zyrtare të fushatës për zgjedhjet e 25 prillit.
222 kandidatët për deputetë do të qëndrojë në skenën e improvizuar, ndërsa përballë tyre janë militantët demokratë dhe të opozitës në tërësi, të cilët janë duke qëndruar në dhe mbi makinat e tyre që kanë “pushtuar” sheshin.
Një prej të pranishmëve u bën thirrje vazhdimisht mbështetësve demokratë dhe të opozitës që të mbajnë distancën dhe maskat.
“Ne jemi Partia Demokratike. Ne kujdesemi për njëri-tjetrin”, përsërit ai vazhdimisht.
“Ju lutem, ftoj të gjithë të pranishmit që të futen në makina e tu bien borive që të na dëgjojë Edi Rama se pak metra larg nesh është”, ka thënë ai në një moment tjetër.
