Bota e artit u trondit nga lajmi se Luran Ahmeti ka humbur jetën për shkak të virusit. Aktori i mirënjohur nga Maqedonia e Veriut, ndodhej prej disa ditësh i shtruar në spital, por fatkeqësisht nuk mundi të mbijetojë për shkak të komplikacioneve të rënda.
Miq dhe kolegë të tij shprehën ngushëllime, ndërkohë që së fundmi ka reaguar dhe grimieri, mik i të ndjerit, Armend Ramadani. Ky i fundit ka publikuar bisedën që ka zhvilluar për herë të fundit me aktorin.
Gjatë bisedës, aktori tregon se ndodhet në spital ndërsa shprehej optimist se do ta mposhtë virusin. Grimieri ka shkruar se aktori ka qenë një ndër mbështetësit e tij më të mëdhenj për të ecur përpara, ndërsa shton se do t’i mungojë shumë.
“Zot më jep forcë ta përballoj dhe këtë ditë të rëndë. Me ty u rrita vëllau im. Ti ishe ai që më përkrahe i pari në botën e artit dhe si ta dua punën dhe si ta bëj krenar familjen. Do na mungosh shumë. Artistët nuk vdesin kurrë.”, ka shkruar ai.
