Kandidatja për deputete në listat e Partisë Socialiste për PS-në në qarkun e Tiranës Najada Çomo është shprehur se i është bashkuar skuadrës së socialistëve të cilët dëshmuan se ishin shumë puntorë.
Ndër të tjera Çomo ka theksuar se nuk do të heqë dorë nga profesioni i saj dhe do të vijojë që të jetë në krye të detyrës për mposhtjen e Covid 19.
“Unë nuk kërkoj votën për vete por për Ogertën që dëshmoi se ishte një person i palodhur.
U ndjeva e vlerësuar dhe e emocionuar që do të përfaqësoj një grup të madh njerëzish që punojnë ditë dhe natë nga personat që shpëtojnë jete. Vlerësimi shkon për kolegët dhe stafin që është në krye të detyrës që janë në Tiranë apo kudo tjetër.
Unë jam një nga ato që do të përfaqësoj me angazhimin tim të gjithë bluzat e bardha. Unë u bashkova skuadrës së socialisteve, unë nuk jam politikane, por jam profesioniste dhe do e ushtroj profesionin tim për të fituar betejën me Covid dhe gjykoj se do të jap më të mirën në fushën shëndetësore”, tha ajo.
Me pak fjalë pavarësisht se renditet e dyta në listën e kandidatëve të PS për qarkun e Tiranës, Najada Çomo duket se nuk synon vendin në Parlament. Ndoshta ajo mund të pretendojë që nëse Rama merr mandatin e 3 si Kryeministër postin e ministres, por duket se ajo i është bashkuar asaj që konsiderohet si skuadra e PS, ndoshta me idenë se mund të përmirësojë imazhin e Rilindjes.
Nëse ajo i ka hyrë fushatës për të ndihmuar Ogerta Manastirliun, atëherë këtë gjë mund ta bënte edhe pa u përfshirë si kandidate për deputete.
