Gjykata e Fierit ka lënë në burg Albert Zajën, i cili dyshohet të jetë personi që vrau Shkëlzen Kastratin më 1 Shkurt, në Fier. Zaja është i pari i dyshuar që është arrestuar nga policia në lidhje me ekzekutimin e Kastratit. Tre të tjerë që dyshohet të kenë qenë bashkëpunëtorë, janë ende në kërkim.
Ndërkohë, mësohet se 37-vjeçari nuk e ka pranuar autorësinë e krimit. Ai ka deklaruar se ditën që ndodhi vrasja ishte në Vlorë me makinën e një shoku.
Po ashtu, Zaja ka kërkuar që të qëndrojë në burg për arsye sigurie, pasi ndihet i frikësuar. Alberti ka kërkuar që të transferohet në një burg të sigurisë së lartë, por sipas procedurës, ai është nisur për në burgun e Fierit.
Albert Zaja, i vetmi i arrestuar deri më tani për atentatin e kryer ndaj Shkëlzen Kastratit, është shprehur se në Vlorë ka shkuar me makinën e një shoku e më pas është kthyer për në Fushë-Krujë ku ka edhe banesën.
