Shqipëria vijon përgatitjet në Barcelonë për ndeshjen e datës 25 mars ndaj Andorrës, e para për fushatën eliminatore të Kupës së Botës së vitit të ardhshëm në Katar.
Sipas asaj që raporton Supersport skuadra ka kryer sot e plotë stërvitjen e drejtuar nga trajneri Reja, pasi kuqezinjve u është bashkuar edhe Etrit Berisha, Mario Mitaj dhe Frederik Veseli.
Kjo ishte seanca e dytë dhe e fundit që kuqezinjtë zhvilluan në kompleksin sportiv të klubit të Espanyol, “Daniel Jarque”, aty ku Bare stërvitet thuajse çdo ditë, pasi nesër paradite delegacioni i Kombëtares do të niset drejt Andorrës, ku do të kryejë edhe stërvitjen e fundit para ndeshjes së planifikuar për mbrëmjen e të enjtes.
Nesër pasdite është planifikuar edhe konferenca zyrtare për shtyp e trajnerit Edi Reja dhe kapitenit të kuqezinjve, të cilët kanë si objektiv ta nisin edicionin eliminator me sukses para se të nisen për në Shqipëri për të përgatitur ndeshjen me Anglinë në “Air Albania”.
