Në pjesën më të madhe të këtij sezoni, Tirana jo vetëm që nuk ka qenë në garë për titull por shpesh është vënë në diskutim edhe prezenca e tyre në Europë. Një diskutim i tillë mbeti në fuqi edhe pas humbjes në derbi kundër Partizanit por ja që gjërat ndryshojnë sërish pas vetëm një jave.
Bardheblutë arritën një fitore të madhe përballë Laçit kryesues duke mbajtur të ndezur objektivat e tyre. Në një sezon të tillë ku balancat ndryshojnë javë pas jave, Tirana me të drejtë pretendon se janë edhe ata në garë, jo vetëm për një vend në Europë, fundja edhe kreu nuk është larg, 7 pikë. Për të përforcuar edhe më shumë këtë fakt, në ndihmë të Tiranës i vjen edhe kalendari.
Pas pauzës që sjell Kombëtarja, Tirana luan dy sfida të lehta në letër, përballë dy ekipeve të fundit në tabelën e klasifikimit, pret fillimisht Apoloninë dhe më pas luan në transfertë kundër Skënderbeut.
Në këto dy javë, rivalët e Tiranës përballen ndërmjet tyre, Vllaznia-Partizani dhe Laçi-Teuta, nëse bardheblutë arrijnë të marrin pikët e plota në dy javët e radhës, situata mund të ndryshojë sërish, me Tiranën që ka një mundësi të shkëlqyer për tu futur në vallen e titullit kampion.
