Edmond Koçi i ekzekutuar me 38 plumba në Durrës ishte marrë i pandehur për armëmbajtje pa leje që prej datës 21 janar 2021. Por veçse ishte personazh i njohur për policinë, ai kishte krijuar në qytetin bregdetar edhe terren në biznese.
Edmond Koçi konsiderohej si krahu i djathtë i Plaurent Dervishaj, njeriut që u arrestua dhe lirua në Dubai, për vrasjen në 25 shkurt 2005 të Klodian Saliut dhe biznesmenit Vajdin Lamaj.
Një nga pistat e hetimit është një vijueshmëri e luftës mes bandave kriminale që veprojnë në Durrës dhe Shijak.
Seriali i ekzekutimeve dyshohet se ka nisur për shkak të pronave në Gjirin e Lalëzit, ku sulmi i parë është realizuar në qershorin e vitit 2019, ku tre persona qëlluan me armë automatike “Rang-Rover”-in, ku udhëtonin Plaurent Dervishaj, miku i Edmond Koçit, Julian Meçaj dhe Bashkim Haxhia.
Brenda një kohe shumë të shkurtër prej 5 muajsh, në mbikalimin e Sukthit në Durrës, qëllohet me breshëri automatiku, Landi Muharremi ose “Rrumi”, prokurori Arjan Ndoja dhe shoferi Andi Maloku. Nga ky atentat i befasishëm, mbeti i vrarë Andi Maloku, ndërsa u plagosën rëndë prokurori Ndoja dhe Landi Muharremi. Për këtë ngjarje u arrestua Redjan Rraja dhe Arjol Halilaj, që momentalisht janë marë të pandehur nga SPAK.
Më pas në muajin Janar 2021 ekzekutohet në qendër të Durrësit, Jetmir Bregu Alias, Ilir Kuçi ose siç njihej ndryshe në Durrës me nofkën “Loku”.
Vrasja e tij, sipas policisë së Durrësit, dyshohet se lidhet ngushtësisht dhe ishte kundërpërgjigje e atentatit mafioz të realizuar ndaj Landi Muharremit dhe Arjan Ndojit, pasi pala kundërshtare dyshonte se “Loku” në këtë ngjarje ka shërbyer si vëzhgues-informator.
Dy muaj pas Bregut, thuajse me të njëjtën skemë është ekzekutuar dhe i njohuri i tij, Edmond Koçi, krahu i djathtë i Plaurent Dervishaj. Vrasja ka lidhje me serialin e ekzekutimeve mes dy grupeve kriminale në Durrës dhe Shijak, që zanafillën e ka tek konflikti për pronat në zonën e Gjirit të Lalzit.
