Sot në Maqedoninë e Veriut do të vendoset në lidhje me masat kufizuese për shkak të koronavirusit. Kjo e hënë shënon edhe fundin e afatit 12 ditor të vendosur nga autoritetet shëndetësore në Maqedoninë e Veriut si një masë për parandalimin e përhapjes së virusit vdekjeprurës që prej më shumë se një viti ka gjunjëzuar të gjithë botën.
Pavarësisht masave shtrënguese në Maqedoninë e Veriut nuk është vërejtur një përmirësim i situatës me shifrat e koronavirusit, ku jo më larg se ditën e shtunë, vendi regjistroi edhe shifrën më të lartë ditore të viktimave me 24 të tillë.
Në një deklaratë për mediat, ministri i Shëndetësisë, Felipçe, është shprehur se qeveria do të respektojë mendimin e ekspertëve, por mbetet e gatshme të zbatojë masa shtesë restriktive.
