“OSBE pret të shikojë zgjedhje të lira, të ndershme dhe sipas standardeve ndërkombëtare”, deklaroi sot në Tiranë, Urszula Gacek, kryesuesja e delegacionit të Misionit të Vëzhgimit të OSBE/ODIHR-it për zgjedhjet 25 prillit.
Në një konferencë për mediet me rastin e hapjes zyrtare të misioni të vëzhgimit të zgjedhjeve parlamentare në Shqipëri, Gacek tha se “jemi këtu me ftesë të autoriteteve shqiptare dhe jemi të ftuar nga Shqipëria”.
“Ne jemi këtu për të vlerësuar si do të shkojnë këto zgjedhje dhe se sa do të jenë në përputhje me standardet ndërkombëtare. Ka pasur reforma. Do të kemi shumë gjëra të reja për të parë, por edhe për votuesit do të ketë sfida të reja. Do të shohim shumë aspekte dhe se sa do të jenë në gjendje votuesit të bashkëpunojnë në këtë proces. Të gjitha standardet që do të aplikohen në Shqipëri, aplikohen dhe në vende të tjera, janë të njëjtat rregulla dhe standarde”, tha ajo.
Gacek theksoi se si një skuadër ndërkombëtare, në mënyrë strikte jemi të paanshëm. “Kemi përfaqësues nga Polonia, Britania, Italia, Gjermania, Estonia, Rusia, Sllovakia, Bosnje Hercegovina, Armenia dhe Taxhikistani. Jemi këtu shumë kohë para zgjedhjeve. Kemi vëzhguar situatën, por patjetër që vëzhgimi i zgjedhjeve është edhe më i gjerë. Do të shohim se si zhvillohet fushata, por edhe shumë elementë të tjerë”, tha ajo.
Gacek theksoi se “jemi këtu si vëzhgues dhe jo për të ndërhyrë në zgjedhje, por jemi për të dhënë mendimin tonë”.
“Nuk jemi të interesuar për rezultatin politik, por se si do të shkoj procesi. Nëse do të jetë transparent dhe në përputhje me standardet ndërkombëtare”, tha Gacek, ndërsa theksoi se misioni do të dalë me 3 raporte, ku te raporti përfundimtar do të nxjerrë konkluzionet dhe rekomandimet përkatëse.
E pyetur mbi përplasjet gjatë takimeve elektorale në Elbasan, Gacek tha se “besoj se të gjithë janë të interesuar për gjithçka para se të filloj procesi zgjedhor, por jemi shumë të kujdesshëm për idetë që do të japim”. “Ne duam që të marrim çdo informacion të mundshëm lidhur me atë që ka ndodhur që të japim opinionin tonë”, tha ajo.
E pyetur mbi mënyrën e re të votimit për subjektin politik dhe kandidatin, Gacek tha “do të ketë një mënyrë të re votimi dhe do të jetë edhe sfidë për votuesit”. “Patjetër që do ta shohim nga afër këtë çështje. Informacioni për votuesit do të jetë. Do të ketë një program të veçantë lidhur me si do të votohet”, tha ajo, ndërsa theksoi se misioni do të qëndrojë në Shqipëri deri në 17 maj.
Gacek tha se për shkak të masave anti COVID do të jetë një mënyrë e re votimi dhe kjo është një sfidë më vete për zgjedhësit.
“Unë e thash që në fillim që të gjithë vëzhguesit që kanë shumë eksperiencë në raste të ndryshme do të jenë në terren dhe do të merren me të gjitha problematikat. Zonat e nxehta nuk i dimë ende, por do të jemi të vendosur kudo. Do të përpiqemi të mbulojmë zonat dhe të jemi në gjendje të shohim gjithçka, nuk do të jemi vetëm në Tiranë, por kudo që do të jetë e mundur, edhe unë dua të bëj disa hulumtime në kuadër të kësaj”, tha Gacek.
